Old Trafford-ah EPL hmahruaitu

English football-ah Liverpool leh Manchester United tluka club inhal an awm kher lo ang. Pathianni zan dar 9:00-ah he club inhal pahnih hi an intawng dawn a, inkhel en châkawm bik zinga mi a ni. 

Liverpool hian Premier League match riat an khelh tawhah hnehna an chan vek laiin Manchester United erawh vawi hnih chauh la chak an ni a, team pahnih inkar a zau hle. Mahse, United hian Liverpool kaltluang lai chelh tluka chak an nei lo ang tih a chiang a, Reds-in United chet chhiatna Old Trafford-ah belhchhah an duh dawn - nuih an chak!

United legend Gary Neville leh Roy Keane te kha Liverpool an huat avanga Red Devils laka tla na an ni tel a, Steven Gerrard kha a thiamna piahlama United huatna a seilen pui kha Liverpool fan-ten an ngaihzawn rawn chhan a ni tel. 

Pogba tel lohna 

United-in Liverpool hmachhawn turin Paul Pogba a dam hman beisei mah se French midfielder inlan theih loh tur thu hi tihchian a ni a, August thla tawp lam hnuah khan khelmualah kan hmu ta rih lo. Goalkeeper David de Gea chu Spain tana a fehchhuahna lamah a inhliam avangin he thu buatsaih thleng hian a dinhmun a la chiang lo a, a awm loh chuan Sergio Romero chuan goal a veng ang. 

Player kim biaia an khelh pawha beisei phak lo United-in kim lo lehnghalin Liverpool an lo mikhual dawn a ni a, Old Trafford-ah beisei neih san a harsa. United hian relegation zone an hlatna chu point hnih chauh a ni a, Liverpool hi anmahni hnaih bertu Manchester City aiin point riatin an sang fal thung. 

Team chhe zawk leh point nei tlem zawk United-in thu hriat nuam lo an ngaihthlak zut laiin Liverpool-in chanchin lawmawm an nei thung a, an inringtawk sawt ang. Season ṭantira inhliam Alisson Becker chu Liverpool tana goal veng thei turin a lo kir leh tawh a, defender pawimawh Joel Matip-a'n training a zawm leh tawh bawk.

Leicester City laka inhliam Mohamed Salah chu a hrana training tir ni mah se hliam hlauhawm tak niin a lang hran lo a, Red Devils fans tan lawma kut benna chi a la ni rih lo. Salah hian bul ṭan lo ta tehreng pawh ni se Roberto Firmino leh Sadio Mane an la awm cheu a, United tlarhnung tan chuan buaipui tham an la tling ang. 

United-in result ṭha an neih loh avangin coach Ole Gunnar Solskjaer dinhmun a derthawng nia sawi a awm a, mahse Norwegian coach hi a hlauthawng ve lo. Player a nih laia a hmel naupang tak leh a finishing tawih tak vanga "The Baby-faced Assassin" an tih chuan, "Kum thum contract ka nei a, club nen kan inbiak khan hun rei zawk atan ruahmanna kan siam a ni," a ti. 

Ole hian result ṭha an nei lo chungin kawng dik an zawhah a ngai a, mahse he ngaihdan ṭawmpuitu hi a tam lo zawk an ni ang. Chuvangin United striker hlui tan player a nih laia mawi taka goal hmaa a hmawr a bawk ṭhin ang khan Liverpool hmaah a theihna lantir a ṭul a, an hmelma lakah an tlawm a nih chuan fans tam takin an dawh reng dawn lo. 

United leh Liverpool inkhel tura tun hnaia sawi hlawh chu Danny Mills-a Liverpool-United XI tarlan kha a ni - United player a telh miah lo! England international hlui hian Sky Sports-ah Liverpool-United XI ah hian Liverpool formation hman ṭhan 4-3-3 a dah a, Reds tana bul ṭantu regular ho vek a dah. 

Mills-a thutlukna hian chiang takin tun hnaia Liverpool leh United dinhmun a hrilhfiah a, a duthlan ṭawmpuitu hi a tam zawk an ni hial ang. United-in Pathianni zanah he hmingchhiatna zawng zawng thaireh tur hian hun ṭha an nei dawn a, bawhpelh a thiang lo.