Chanmari FC-in Chawnpui an hneh ṭawk

S. Malsawmtluanga awm loh hnua an match hmasa berah Chanmari FC-in table mawngphaha awm Chawnpui FC chu 3-2 in an hneh hram.

Nimin tlai inkhel hmuhnawm takah hian Chanmariin Lalremruata, MS Dawngliana leh Lalnunzama te hmanga goal an khung hnuin Chawnpui tan Lalnunmawia'n goal hnih a khung avangin hun tawp thlengin a hmuhnawm.

Rinkai nichungin Chanmari FC-in bul an ṭan a, mahse Chawnpui FC-in bul an ṭan ṭha zawk. HC Zarzoliana'n hmatawngah captain Lalnunmawia, Lalnunpuia Tlau (Bawihpuia), Vanlalthlamuana leh Moody Lalawmpuia te an chhawr theih avangin an goal nawr na hi a mak lo.

Chanmari an insiamrem a, midfield-ah David Lalrinmuana a ṭangkai a, goal khung tura dah MS Dawngliana, H. Lalmuankima leh Lalremruata ten hun ṭha an bawhpelh. Chance ṭha ber erawh Lalruatfela goal khung tur keeper Vannunmawia'n a dan hnuah goalline aṭangin Lallawmsanga'n a dang.

Chawnpui ṭang thei viau mah se vawi khat mutthluk a pawi. Corner an clear fela an ngaih hnuah vei lam kilah ven uluk loh MK-a rawn dawk zawkin cross ball duhthusam chu Lalremruata'n cool takin minute 49-naah a khung.

Goal luh hnuah Chanmariin inrintawkna ngah sawtin Chawnpui erawh an thathona a reh. Minute 68-naah K. Roluahpuia (K. Mama) ball pek cool takin Dawngtea'n a khung. Chanmari che ṭha chhunzawmin substitute Lalnunzama'n a luh aṭanga minute khatna lekah a pet goal a, minute 71-naah 3-0 a ni.

Man of the match-a thlan Dawngtea a hmuhnawm a, crossbar a pet per hnuah an thlak.

Chanmariin chak tawhah an inngai a, an tisual - Chawnpui an la beidawng lo. Captain Mawitea'n minute 77-naah siphurh sut ṭhenin minute li hnuah chiang zetin a volley goal leh nghal. Chanmari an hlauthawng a, substitute Lalhriatpuia goal khung offside vanga pawm a nih loh bawk avangin hun tawp thlengin awm nuamin an awm lo mah se goal dang a luh belh tawh loh avangin an chak hram.