ISL ṭan a ni dawn ta

India rama football league sang ber Indian Super League chu Pathianni zanah khelh ṭan a ni dawn ta a, dar 7:30-ah Kerala Blasters chuan ATK an mikhual dawn.

Blasters hi ISL-a entu ngah ber tih ngam khawpa fans ngah an ni a, Kochi khawpuiah fans 50,000 chuang an pungkhawm leh ngei dawn tih a chiang. Chumiin chiang taka a tarlan chu ISL a 'hot' nghal dawn tih hi a ni a, Mizo player che tla vel hmuh tur a awm ṭhin bawk avangin Mizoram aṭang pawhin ngaihven a hlawh zel ang.

Kerala Blasters-in Mizo pahnih Lalruatthara leh Samuel Lalmuanpuia an kawl a, Ruatthara hi Kochi club tana a kum thum khelhna tur a nih laiin Samuel hi a season hmasa ber tur a ni thung.

Blasters-a season hnih hun a hmanah Ruatthara'n hmun pawimawh a chang ve ve a, tun season-ah pawh coach thar Eelco Schattorie kawl mah se bul ṭan regular tura ngaih a ni. Shillong Lajong captain hlui Samuel-a'n Blasters a zawm chauh avangin inkhel bul a ṭan nghal a rinawm hrih lo a, Zemabawk North tlangval hian Schattorie hmaah bul ṭan turin a ṭha tawk tih a lantir phawt a ṭul ang. 

Blasters hian season hmasaah beisei an phak loh avangin NorthEast United coach Eelco an lalut a, Dutch coach enkawlna hnuaiah final luh an inbeisei dawn. Blasters hian tlarhmaah player langsar vut an kawl hran lo a, chutihrual chuan Cameroon international forward hlui Raphael Messi Bouli an nei a, set piece pet turin Samuel-a chu mamawh huna chhanna tur a ni ang. 

Lalruatthara'n ISL (2017-18) season-ah Emerging Player Of The Season chawimawina a dawng a, kuminah mimal chawimawina dah ṭhain nomawi chawi a beisei ang. 

ATK-in Sena Ralte, Ricky Lallawmawma leh Malsawmzuala te an kawl a, Mizo awmna club pahnihin Pathianni zanah ropuina leh point an inchuh ang. Sena hi season hmasaa red card a hmuh hnuah ATK tan chhawr rim a ni lo a, full back ṭangkai a nih theih beisei a ni. Ricky hi coach kal chhuak ta Steve Coppell  hnuaia hmun pawimawh chang a ni. 

Malsawmzuala hian season hmasa chawhnu lam kha Jamshedpur-ah loan-in hun a hmang a, tun season-ah ATK-ah kirin a cham chhunzawm. 

ATK hian Blasters ang thoin coach thar an nei a, ISL season hmasa bera nomawi chawipuitu Antonio Lopez Habas chu Kolkata khawpuiah an hruai kir. 

Valencia boss hlui hian ISL-ah Pune City pawh a lo enkawl tawh bawk a, Indian football-ah a mikhual lutuk loh avangin a talbuai lo ang. Blasters coach Eelco hi season hmasaa NorthEast United enkawltu kha a ni a, Highlanders tana result ṭha a neih beiseiin Kochi lamah a insuan - coach thar pahnihin chungnun an inchuh dawn e. 

Kum 25 mi striker Jobby Justin-a'n season hmasa I League-a hrem a nihna a la chhawm zel a, Aizawl FC defender Kareem Nurain laka a chet mawi loh avanga hrem striker hian ATK tana khel turin match thum khelh a la hmabak avangin a inlan thei dawn lo.  

Anas Edathodika chu ATK tan tlarhnungah a inlan thei dawn lo bawk. Kerala tlangval hian season hmasa kha an state club tan hian a khel a, Super Cup-a a red card hmuh chu a la chhawm zel. Kum 32 mi defender hian season hmasaa a khelhsak club hi 'anmahni' vang thoin a hmachhawn thei dawn lo a ni ber a, ATK-in player pahnih tel loa khelh an zir daih tawh ang.