Bayern-in Flick an ring ngam dawn em?

Bayern Munich chuan zanin dar 1:00 hian Paderborn an mikhual dawn. Bundesliga champion lai hian manager atana Hansi Flick an hman hnuah hmasawnna hmuh tur a awm a, league-ah hmahruaitu an ni leh tawh. Amaherawhchu Bavarians hian season tawpah Flick-a dinhmun hi an tichiang chauh dawn a, German manager hian a nghak thei ang em tih erawh a chiang lo thung.

German chanchinbu lian Bild-in a ziah danin Bayern hian Flick hi contract an la zawrh lo a, chutihrualin club ṭhahnem takin Flick hi manager atana an sawm avangin season tharah assistant coach hna chelh a tum tawh lo. Bayern hian 2020/21 season atan manager an la nei lo a, Flick hi rinkai ber a la ni.

Bayern president Herbert Hainer chuan season tawpah thutlukna an siam chauh tur thu a sawi tawh a, Bild-in a tarlan danin he thulukna hian Flick hi a tihnual hle. Hei chauh hi a ni lo, Bayern hian Champions League-a Chelsea an hmachhawn zawhah player pawimawh Thomas Muller, David Alaba leh Thiago Alcantara te contract pawhsei dan tur an ngaihtuah dawn. Hemi chungchang ngaihtuahtu zingah Flick hi telh a ni lo a, sporting director Hasan Salihamidzic (Brazzo) nen a inkar a ṭha loah ngaih a ni bawk.

Brazzo hian Bayern enkawl turin Tottenham Hotspur manager hlui Mauricio Pochettino a duh nia hriat ni a, club board lamin an ṭawmpui lo thung. Bavarians enkawl turin German manager ṭha Jurgen Klopp leh Julian Nagelsmann te sawi rik a ni a, mahse Klopp leh Nagelsmann te hi Liverpool leh RB Leipzig-ah an rinawm avangin an chhuah theih a rinawm loh. Hei vang hian Flick hi season thara Bayern enkawl tura rinkai ber a ni a, chutihrualin manager nghet ni tur chuan Flick-a hote hian Bundesliga nomawi humhim bakah UEFA Champions League-ah Chelsea an hneh ngei a ṭul ang.