Mang rama cheng Atalanta

Italian club Atalanta chu mumang ramah an chen chhun-zawm zel a, Champions League-a an season hmasa berah an ke lehlamin quarterfinal an rap tawh. 

Nilaini zan khan Champions League round of 16 first leg-ah Atalanta hian an mikhual Valencia chu 4-1 ngawtin an lo sawp a, a thiam pariat zingah an tel chiang tawh angin a sawi ngam ta. 

Atalanta tan hian Hans Hateboer chuan goal hnih khungin Josip Ilicic leh Remo Freuler-ten goal khat ve ve an khung bawk a, Spanish club tana Denis Cheryshev goal khung chu Valencia tana beiseina tlem siamsaktu a ni. 

Atalanta hi Bergamo khawpuia innghat an ni a, an stadium Gewiss Stadium pawh he khawpuiah hian a awm. Mahse, mipui 21,300 lenna stadium hian UEFA tehna a paltlang zo lo a, European football a thleng thei lo. 

Inter Milan leh AC Milan ten an inṭawm San Siro Stadium chu Atalanta hian an home match khelh nan an hmang a, an khua aṭanga km 55-a hlaa an inkhel chungin he team hian fans an ngah hle. 

Khawthlang media ten an tarlan danin fans 40,000 zet chu San Siro-a an inkhel en turin an zin a, player-ten fan-te inpekna hre rengin result lawmawm nen an chhang let. 

Atalanta hian season hmasa khan Serie A-ah pathumna dinhmun an luah a, Champions League khel tur hian an tlin phah - an match hmasa pathumah an tlawm nghal!

Mahse, Italian club hi an match hnuhnung pathumah vawi hnih chakin vawi khat an khingpui an inhnehtawkpui a, group B-ah Manchester City chiah phak loin an hnuaiah Shakhtar Donetsk leh Dinamo Zagreb an awm - last 16 an lut. 

Atalanta tana goal khat khungtu Ilicic-a'n tun season inelna hrang hrangah goal 16 a khung tawh a, Slovenian striker chet ṭhat zel hi Italian club tan a ṭangkai dawn. Hetihrual hian tun season CL-a goal 12 an khung tawh hi player 10-in an khung a ni. Team thawhhona chu an thupui ber a ni.