Chelsea-in legend Lampard an ban Lampard - Out; Tuchel - In

Chelsea-in thla 19 hnuah Frank Lampard chu manager aṭangin an ban a, London club hi Premier League-ah pakuanaah an awm mek. 

Blues hian Pathianni zan khan FA Cup fourth round-ah Luton Town 3-1 a an hneh chungin club thuneitute chuan Lampard chungah beiseina an nghat ngam tawh lo a, ban turin thutlukna an siam. 

Chelsea-in nipui bazarah pound maktaduai 200 chuang an hmang a, chung zingah chuan German player Kai Havertz (£71m) leh Timo Werner (£47m) te an tel. Blues rawlthar ṭha rual enkawl tur hian German manager Thomas Tuchel chu an lalut tura ngaih a ni.

Roman Abramovich-a'n Chelsea player ropui ber zinga mi Frank Lampard chu July 2019 khan manager atan a lalut. Kum 42 mi Lampard hi Stamford Bridge-a rorel tura ruat a nih hian club lian a la enkawl lo.

Lampard hian Championship club Derby County chu season khat a enkawl a, sum hmang tam Rams hi playoff thlenpui mah se Premier League a thlenpui thei lo. Chelsea-in risk an la a, Lampard pawhin player a nih laia a hming chherna hmunah hming hliau thei a ni tih hre chungin huaisen takin chona a hmachhawn.

Blues-in Lampard-a hnuaia an season hmasa berah palina an nih pui a, hrem vanga transfer-ah player an lakluh loh bawk avangin bul a ṭan chhe lo. FA Cup-ah final an thleng a, Arsenal lakah an vanduai vang chauhin nomawi an chawi lo.

Chelsea hremna hlih a ni a, Roman Abramovich-a'n tun hma ang thoin club ṭhatna tur a nih chuan sum hman tam a hreh lo.

July 1, 2020-ah player a ziahluh theih ṭan a, Blues-in an tal na nghal hle. Ajax aṭangin pound maktaduai 36-in Hakim Ziyech an lalut a, RB Leipzig aṭangin pound maktaduai 47 zetin Timo Werner an la bawk.

Hetah hian an duh tawk lo, Leicester City wing back Ben Chilwell (£45m) leh Bayer Leverkusen aṭangin Kai Havertz (£72m) an lalut a, player pali man hi pound maktaduai 200 a ni deuh der tawh.

Chutah a thlawnin hming langsar Thiago Silva an lalut a, Brazilian defender ṭha an neih leh tak avangin an thawm a ring tawh hle. Chelsea-in sum an ngah bawk a, keeper manto Kepa Arrizabalaga (£71.5m) thlak nan Rennes aṭangin pound maktaduai 22 man Edouard Mendy an la leh bawk.

Chelsea-in an duh zawng apiang player an lalut a, amaherawhchu hei hian 'pressure' a keng tel. Lampard-a'n Blues a enkawl hmasak berah pressure a nei lo a, season hnihnaah erawh sum an hman tam miau avangin pressure a tam ta hle.

Chelsea-in December 5 khan Leeds United 3-1 in an hneh a, Premier League hmahruaitu an ni. Frank Lampard an fak a, ban thawm a la ri lo. Amaherawhchu hemi hnu hian Blues hi an che chhe zui a, December thlaa match nga dang an khelhah vawi khat chiah chakin vawi thum an chak lo.

Stamford Bridge boruak a inthlak a, Lampard-a ban duhtu pawl an awm ṭan. Kumin January 3 khan Manchester City-in Blues 3-1 in an sawp a, Pep Guardiola hoten inkhel an thunun bawk avangin club thuneituten manager thlak an ngaihtuah ṭan.

Blues hian player 10-a khel Fulham an hneh hram a, Champions League khel tura an elpui Leicester City an hneh loh avangin pakuanaah an tla thla. Chelsea-in result ṭha an neih loh bakah an player manto Kai Havertz leh Timo Werner te che chhia chuan club thuneitute rilru a ti na zual bawk.

Chelsea-in Lampard an ban chhan hi result ṭhat loh vang a ni a, khelmual pawnah boruak ṭha lo a awm bawk. English manager hian first eleven-a chhawr ngun bik a nei a, heta tel pha lo player-te nen an boruak a ṭha lo.

Season ṭan hmaa Lampard-a tana hmachhawp chu Werner leh Havertz te hmang ṭangkai chunga team ṭha din a ni. Kum 2012-a Lille aṭanga an lakluh Eden Hazard hnua an player langsar lakluh Werner leh Havertz te hi English manager hian hmang thiam tawk lo a, khelh dan phung nghet ṭha a neih theih loh avangin a hnain a tuar ta a ni.

Lampard-a'n season khatnaah Chelsea hi match 20-ah hnehna an chanpui a, vawi 12-ah an chak lo. Blues hi point 66 hmuin palinaah an awm. Tun season league match 19 khelh tawhah vawi ruk an chak lo.

English manager Lampard hian league-ah match tina 1.67 point hmu ang a ni a, Chelsea manager zinga Premier League-a match tina point hmu chhuak tlem ber a ni. Roman Abramovich-a'n London club a lei hnuah inelna hrang hrangah Andre Villas-Boas-a'n 40% chak percentage a nei a, Portuguese manager chiah hi Lampard (52.4%) hnuaiah a awm.

Hetihlai hian Jose Mourinho-a'n season khatnaah 67.03% chak percentage a nei pha a, manager dang Antonio Conte, Maurizio Sarri, Avram Grant, Carlo Ancelotti leh Claudio Ranieri te pawhin 60% chung lam chak percentage an nei vek bawk.

Lampard thlakna tur Thomas Tuchel hi kum 47 mi chauh a ni chungin club enkawl lamah sulhnu nei ṭha hle. German manager hi a inkhelh hun laiin defender a ni a, kum 25 mi lek a nihin khup hliam vangin a career a tawp.

Senior team a enkawl hmasak ber chu Mainz 05 a ni a, Liverpool  manager chhuanvawr Jurgen Klopp a thlak. Season nga chhung Mainz-a a awm hnuin sum chungchanga inhmuh thiam loh avangin 2014 khan a chhuak a, Borussia Dortmund enkawlin a thlak chu Klopp tho a ni.

Tuchel hian Dortmund a enkawl lai hian DFB Pokal a chawi a, Paris Saint-Germain-in Champions League nomawi beiseiin kum 2018 khan Tuchel hi an lalut. German manager hian Ligue 1 nomawi ṭum hnih chawipui a, Champions League final thlenpui mah se Bayern Munich lakah an vanduai.

Tun season ṭantirhah PSG an chet ṭhat tawk loha vangin French champion-in Tuchel an ban a, coach tawnhriat nei ṭha hi Chelsea-in an lakluh dawn avangin a awl rei dawn lo.