Mizoram Super League Season 6 A sang pali zinga tel inbeisei Chanmari Vikings

21st February, 2020

Tualchhung basketball inelna lian ber Mizoram Super League season 6 inbuatsaihna chuan a vawrtawp a thleng chho mek, team thar Chanmari Vikings coach H. Lalhruaitluanga chuan club lian dang elphak an nih a beisei thu a sawi.

Vikings hian Mission Veng Vikings an nih laiin MSL nomawi an chawi tawh. Kuminah erawh Chanmari hminga inlan tur an nih avangin team thar anga sawi theih an ni, player bakah coaching staff erawh chu tawnhriat nei ṭha an ni nawk thung.

Beiseina

Nimin thleng khan Chanmari Vikings hian squad-ah player 11 an nei, state pawn aṭanga player lakluh an tum pahnih a rem lo. Coach Lalhruaitluanga chuan, "February 24 thleng hun kan nei a, inelna ṭan hma chuan player ṭha kan neih belh ngei ang," tiin Vanglaini a hrilh.

Captain Michael F. Lalawmpuia leh vice captain Lalruatkima Sailo te hi coach Ahruaia kaihhruaina hnuaiah Vikings tana nomawi chawi tawh an ni a, kuminah anni pathum hi an thawkho leh dawn.

Mission Veng tlangval Ahruaia chuan, "Zep tur a awm lo, kan squad en mai chuan a ṭha ber chu kan ni lo ngei mai. Mahse, theihtawp kan chhuah dawn, player an ṭang hle a ni. Aizawla veng lian Chanmari behchhan tur kan nih avangin kan zam lo," tiin a sawi.

A sang pali

MSL vawi hnih champion tawh Khatla TBL leh Zarkawt BCA te hi an chesual viau a nih loh chuan semifinal lut chiang tura ngaih an ni a, tun hma lama an sulhnu en chuan Tuikual South pawh rinkai an ni. Vikings, Ramhlun SC leh Chawnpui ten hmunruak pakhat an inchuh a rinawm.

Chanmari Vikings coach Lalhruaitluanga chuan, "A sang pali zinga tel turin beisei chu kan nei, kumtir aṭangin inbuatsaihna kan nei tawh," a ti. Tualchhung player bikah chuan Vikings hian mimala innghahna lian an nei lo ang, thawhhona ṭha an tan a pawimawh dawn.

MSL-ah hian team paruk an awm, vawi khat ṭheuh an inkhelh kual hnuah point hmu sang pali ten semifinal an khel ang - a hniam pahnih chuan relegation playoff an khelh a ngai dawn. Vikings hian MSL6 an match hmasa ber atan February 28, Zirtawpniah Khatla TBL an hmachhawn ang.