Liverpool vul lai = United chhiat lai

Premier League la chawi lo mah se Liverpool-in match 17 chhung league match an chak zawn tawh avangin an vul lai a ni a, Pathianni zan khan table chanve hnuai lama awm Manchester United hmachhawn turin Old Trafford-ah an lenglut. Jurgen Klopp-a hote hi Paul Pogba tel lohna United nen an an inchai tawk a, minute 85-naa substitute Adam Lallana goal hmangin Ole Gunnar Solskjaer hote nen 1-1 in an in draw hram.

Klopp-a hote hian hnehna an chan zawh loh avangin Manchester City-in August leh December 2017 chhunga match 18 chak hmel an hmuh record chu an tlukpui thei lo a, Liverpool ṭantute tana na ber erawh an hmelma United laka an vannei chunga point thum an hlawh chhuak lo hi a ni.

Liverpool-in an keeper Alisson an chhawr leh thei tawh a, tlarhnung innghahna Virgil van Dijk-a'n ho theiin mual sir aṭanga an nawrna Andrew Robertson leh Trent Alexander-Arnold te an awm. Tlarhmaah Reds goal khung khawl Sadio Mane leh ṭhiante ball ṭha pe thiam Roberto Firmino te an awm. Liverpool duhthusam an nih lohna awmchhun chu inhliam vanga Mohamed Salah awm lo a ni.

Manchester United manager Solskjaer-a'n duh vang renga hming langsar Romelu Lukaku leh Alexis Sanchez te a chhuahtir hnuah hliam vangin Paul Pogba, Luke Shaw, Jesse Lingard leh Diogo Dalot te a chan a, no. 9 position luahtu tur ber Anthony Martial pawh dam kawr vangin bench-a dah a ṭul. Harsatna belhchhah turin warm up-naah starting eleven-a awm tur Axel Tuanzebe a inhliam a, Marcos Rojo-a'n a thlak leh hnuhnawh bawk.

Amaherawhchu Norwegian manager Solskjaer-a'n tum dan fel tak neiin central defender pathum Harry Maguire, Victor Lindelof  leh Rojo te a hmang a, mual sirah Aaron Wan-Bissaka leh captain Ashley Young te an awm. Daniel James leh Marcus Rashord te tlan chakna chu mual neitu innghahna a ni a, United squad panzia a lang.

Table thlir loa mual chhung chauh en chuan United chu team ṭha zawk an ni a, Liverpool an che thei lo. Old Trafford-ah Liverpool-in mual danga an khelh dan an pho chhuak thei lo a, David de Gea tan hna an siam thei lo.

United-in inkhel thunun zawk mah se goal hmaah an hriam tawk lo a, Andreas Pereira a khel ṭha thawkhat nachungin a hmawr a bawk theih loh avangin keeper Alisson tan hna harsa a awm chuang lo. Chutihrualin Liverpool tlarhnung erawh an buai tih a lang a, Rashford hmaa Van Dijk-a tlu thlawp chuan inkhel kalhmang tlangpui a sawifiah.

Minute 36-naah United-in an khelh ṭhat rah an seng a, counter attack hmanga vaw letin mual sira nung ṭha tak Daniel James cross ball chu Marcus Rahsford-a'n a khung. Goal hi VAR hmanga en let a ni a, Victor Lindelof-a'n Divock Origi ball a chhuhsak lai chu referee Martin Atkinson-a'n chiang taka a hmuh avangin goal hi kaltlangpui a ni.

Liverpool-in Mane hmangin siphurh an sut zuiah an inngai a, amaherawhchu Senegalese forward hian goal a khung theih nan ball-in a kut a per avangin VAR hmangin goal hi pawmsak a ni lo.

Manchester United-in goal an neih avangin second half-ah goal venhim hna an thawk ta thung a, Liverpool-in inkhel an thunun ta zawk. First half-a United-in an dah ṭhat Robertson leh Alexander-Arnold te an rawn langsar ta hret a, Klopp-a hote inkhel nung ta deuh mah se ṭum dang an pha lo hle.

German manager Klopp-a'n goal beiseiin Alex Oxlade-Chamberlain, Adam Lallana leh Naby Keita te a luhtir a, Solskjaer erawhin player a khawih che ngam lo. Arsenal forward hlui Oxlade-Chamberlain-a'n goal ban pawn chiahah a pet out a, United an ṭang tluan dawn niin a lang.

Amaherawhchu Liverpool-in United chetfuh tawk lohnaah chhu fuh chiahin Lallana-a'n minute 85-naah siphurh a sut. Vei lama aṭanga cross-tu Robertson chu Wan-Bissaka-a'n a hnaih hman loh bakah defence laia awm Marcos Rojo-a'n a bul lawka ball kal chu a khawih hman lo a, Ashley Young-a ven loh Lallana tan harsa tur a awm lo.

Minute nga hun pek belh a nih bawk avangin Liverpool chu chak thei dinhmunah an ding zui a, amaherawhchu Jurgen Klopp-a hoten ṭum dang ang thoin Old Trafford-ah hnehna an chang thei lo.

October 20, Pathianni

Manchester Untied 1 - 1 Liverpool

MAN : Marcus Rashford 36'

LIV : Adam Lallana 85'