Chanmariin Godwin an lalut

Chanmari FC-in squad thuam chak nan nimin khan defender Godwin Quashiga an lakluh thu an puang  a, Ghanaian player hi defensive midfield atan pawha chhawr theih a ni.

Kum 24 mi Godwin hian Mizoram Premier League la khel lo mah se season liam ta khan Chhinga Veng tan Second Divison I League-ah a inlan a, Mizo club innghahna a ni pha. Godwin hi feet ruka sang a nih avangin boruakah a ṭha a, RG Stadium-a a inlan ṭumah ball pawh a sem thei hle. Amaherawhchu MPL khelhna hmun Lammual hi a zim hret avangin Ghanaian player chet muanna hian harsatna a thlen thei a, chutihrualin Chanmari hian an mamawh tak defensive midfield-a khel thei an lalutah a ngaih theih bawk.

Kolasib-a MPL round 6 inkhelah Chanmari hian Chawnpui FC 3-2 in an hneh a, tlarhnung a phui ṭhat tawk loh avangin hun tawp lamah harsatna an tawk. MPL5 champion Chanmari hian October 25, Zirtawpni zan hian Electric Veng an hmachhawn dawn a, Godwin Quashiga pawh CRS-ah a inziahluh fel vek tawh avangin chhawr theihin a awm ang.