South Africa lakah India dinhmun ṭha

India leh South Africa Test match vawi thumna chu Ranchi, Jharkhand-ah khelh mek a ni a, ni hnih khelh tur la awmah Virat Kohli hote chak turin an dinhmun a ṭha hle.

Test match vawi thumna hi October 19 khan khelh ṭan a ni a, ṭhumvawra chak India-in vuak hmasak an thlang. Rohit Sharma-a'n run 212 tehmeuh a vuak chhuah bakah Ajinkya Rahane-a'n run 115 siam bawkin India-in run 497/9d an siam tihin an duhtawk.

South Africa batsman-te India bowler hmaah an mualpho a, Zubayr Hamza-a'n run 62 a siam tih loh chu chhuan tham runs vaw chhuak an awm lo. First innings-ah South Africa-in run 162 chauh an siam avangin 'follow on' a ni a, second innings-ah pawh Proteas an che thei chuang lo.

Nimin tlai thleng khan South Africa hian run 132 siamin wicket riat an hloh a, run 203-in Men in Blue an phak lo mek. Khua a thim zui avangin niminah an inkhel zo hman lo a, vawiin zing dar 9:00-ah khelh chhunzawm tur a ni. India-in wicket hnih chauh an mamawh tawh avangin thilmak a thleng a nih loh chuan 3-0 in series an la ang.