Beidawnna piah ramah Murray

Hliam vangin a buai a, hun rei tak chhung inkhel thei lo mah se Andy Murray-a'n beiseina a nei tlat. Tunah chuan Britain tlangval hian European Open title a la leh ta - lawm avangin a biangah mittui a luang.

Pathianni zan khan European Open final-ah Murray leh amah ang thoa Grand Slam vawi thum champion tawh Stan Wawrinka an inhmachhawn a, set hmasa ber hloh mah se 3-6, 6-4, 6-4 in a chak zawkah a ṭang. Season hnih chuang zet hlawhtlinna chang loa a awm chu a tawp ta rih.

World number 1 hlui Murray chuan, "Tennis ka khelh hun chhunga ka hlawhtlinna lian ber te zinga mi a ni. Ka tan chuan a hlu lutuk, hun harsa em em mai ka paltlang hlim a ni a, hetiang hun thlen leh theih inbeisei mah ila ka ring ngam ngai lo," a ti.

January thla khan a vawi hnih nan Murray hi a khel bawr na zai a ni a, Melbourne Park aṭanga a haw hnu khan singles match a khelh leh beiseina a tlem hman hle. Mahse, zawi muanga hmasawn zelin tunah chuan player dangte angin a inkhel thei ve leh tawh.

Tun dinhmunah chuan Murray hi a ṭhat dan ber a la ni lo tih chu a hriat. Mahse, hma a sawn zel a nih chuan 'best of five' inelna Grand Slam huangah pawh a inlan leh theih a beiseiawm. Major tournament a khelhna hnuhnung ber Australian Open neih a nih leh hunah a hmel kan hmu a nih pawhin a mak lo ang.

Mipa tennis inelna dang Stockholm Open lamah Denis Shapovalov chuan ATP Tour title hmasa ber la turin Filip Krajinovic 6-4, 6-4 in a hneh. Kum 20 mi Shapovalov hian vawi 16 ngawt aces a siam thei a, a service na leh 

ṭha tak hi November 5 aṭanga khelh tur Next Gen ATP Finals lamah chhawr ṭangkai zui leh a tum dawn a ni.