Champions League-ah Madrid khaw club inlan hun

European football-a club inelna ngaihhlut hlawh ber Champions League chu zaninah khelh a ni leh dawn ta a, Atletico Madrid leh Real Madrid an inlan dawn. 

Atletico hian group D inkhelah zanin dar 10:25-ah Bayer Leverkusen an mikhual dawn a, Real hian group A match inkhel turah zanlai dar 12:30-ah Galatasaray khelmual an tlawh dawn thung. Madrid khaw club pahnih hian tun season-ah an fan-te tan lawmna an la thlen hleithei lo a, league-ah beisei an phak lo a, Champions League-ah thawnthu a danglam tam lo. 

Zaninah club pahnih fan-ten point thum an beisei dawn a, hnehna chang zo lo zawk nih an duh dawn lo ve ve - zaninah Madrid khawpui a ngui dawn nge, a hlim dawn? Kan hre thuai dawn e. 

Diego Simeone enkawl Atletico-in an league match hnuhnung berah Valencia chu 1-1 in an inhnehtawkpui a, chu aia chanchin lawmawm lo zawk chu Joao Felix a inhliam. Portuguese rawlthar duhawm hian hliam vangin Leverkusen a hmachhawn thei dawn lo a, German club tan thu hriat nuam a ni. 

Mahse, Atletico hian tlarhmaa chhawr turin Alvaro Morata leh Diego Costa an nei tho tih erawh hriat a ṭha a, Spain striker pahnih hian German club nghaisak an tum ang. Felix aiah Thomas Lemar a luh a rinawm a, Saul Niguez, Koke leh Thomas Partey te nen midfield-ah an awm ho ang. Valencia laka bul ṭan lo Kieran Trippier leh Renan Lodi te tlarhnungah an rawn kir beisei a ni a, Stefan Savic-a la inhliam avangin a aiah Mario Hermoso chu bul ṭan tura beisei a ni. 

Atletico fan-te tana thu hriat nuam tur chu an mikhual tur Bayer hi eng ruai an ni bik lo. Bundesliga table-ah pakuana an ni mek a, insiamṭhat an mamawh. Inelna hrang hranga an match hnuhnung pathumah vawi hnih an tlawm a, vawi khat an khingpui an inhnehtawkpui. Champions League match hnih an khelh tawhah point an la hmu miah lo!

Lokomotiv Moscow an mikhual ṭumin 2-1 in an tlawm a, Juventus lakah 3-0 in an tlawm leh bawk a, Atletico muala chak tura beisei an harsa. Spanish club hian Juventus an inhnehtawkpui bakah Moscow hi 2-0 in an lo hneh tawh a, an hmachhawn tawh club pahnih laka tlawm ve ve Bayer hi an hlau lo ang. 

Tun hnaia Real khelh dan en chuan hmanni lawka season thum chhung a zawna Champions League nomawi chawi thei kha an niin a lang ta lo a, a sawifiahna awlsam chu an result a ni. Real hian Inrinni zan khan league match-ah Real Mallorca chu 1-0 in an ngam lo a, Barcelona bul ṭan chhiat season-ah pawh table chung an luah rei thei lo - fan-te lawmna thlen an harsat.  

Fan-ten inhnem nana an hman ṭhin Champions League-ah pawh eng ruai an ang lo. An match hmasa berah Paris Saint-Germain chu 3-0 a ngam loin an mualpho a, hneh ngei tura ngaih Club Brugge chu Santiago Bernabeu-ah 2-2 in an inhnehtawkpui zui!

Hei vang hian zanin inkhel tur hi Real tan chuan 'thih leh dam' kar ang deuha sawi theih a ni a, an chak lo leh a nih ngat chuan last 16 beisei loh a fin thlak ang. 

Real tan Luka Modric leh Gareth Bale ten hliam vangin Mallorca an hmachhawn tawh lo a, Galatasaray hmachhawn tur zingah pawh an la tel chuang lo. A êng zawnga thlir dawn erawh chuan Eden Hazard, Dani Carvajal leh Toni Kroos te squad-ah an lo kir tawh a, anni pathum hian an theihna anga an khelh phawt chuan ṭhatpui tham an ni. 

Hetihlai hian Turkish club tan Radamel Falcao chuan hliam vangin an match hnuhnung pali a khel thei lo tawh a, Real hmachhawn tura a lo kir hman dawn leh dawn loh a la chiang lo. Hriat tel tur erawh Falcao awm loh hlan hian Florin Andone a che ṭha a, an league match hnuhnung berah pawh goal hnih a khung - Sofiane Feghouli, Steven Nzonzi, Mariano, Emre Mor leh Ryan Babel te an kawl bawk avangin awlsam taka hneh chi an ni lo ang.