Venezuala buaina : Maduro vangin US-in Russia oil firm blacklist-ah a dah
United States chuan Venezuala president Nicolás Maduro ṭanpui vangin Russia thunun oil giant Rosneft Trading SA chu blacklist-ah a dah.
Rosneft Trading SA leh an chairman Didier Casimiro-te'n US-a an thil neih zawng zawng chu khawih chet theih lohin a hrek nghal a ni. US hian Rosneft Trading SA hi a hrek mek Venezuela oil industry ṭanpuiah a puh.
US hian tun thla tirah khan Venezuala state thunun airline Conviasa chu a hrek tawh bawk a ni.
Nicolás Maduro hi US bakah ram dang eng emaw zat chuan Venezuala President-ah hian an pawm lo a, opposition leader Juan Guaidó, nikuma Venezuala President lailawka inpuang chu an thlawp zawk a ni. Maduro hi eirukna bakah tharum thawhnaa chawk chhuakah US leh a thawpui ram eng emaw zat chuan an puh a, amah erawh chuan a pha thung.
Hetih lai hian Russia chuan Maduro hi a thlawp thung a ni. Maduro hian an ram economy tla chhe mek chu tihṭhat leh a lo tiam fo tawh bawk.
Russia-in US a dem
Rosneft Trading SA lam hian thuchhuah eng mah la siam lo mah se Russian foreign ministry chuan thuchhuah siamin US-in Rosneft a hrekna chu an dem hle tih an tarlang.
US-in a hrekna chu an pawm lo tih tarlang bawkin, an hrekna avang chuan Russia leh ram dangte chuan Venezuala chungchanga an rilru puthmang an thlak phah dawn lo a ni, an ti.
Venezuala buai chhan
Venezuala president Hugo Chávez thih hnua April 2013-a Venezuala President thlannaah khan Nicolás Maduro hi vote tlemte in a chak a, May 2018-a inthlanna neih lehah khan thlan nawn leh a ni.
A term hnihna tura inthlan nawnaa a chak danah hian international observer-te chuan thil dik lo a awm niin an hmu a, hemi hmu hian an ram economy chu tla chhe zui bawkin inflation pawh 8,00,000% lai a ni. Mi makatduai thum chuangin an ram an chhuahsan zui bawk.
Hemi a nih avang hian opposition leader Juan Guaidó chuan Maduro chu a office luah zui tlak lo a ni tiin, president lailawkah a inpuang a, mi tam takin an thlawp bawk si avangin Venezuala ram hi nasa takin a buai ta a ni. Guaido thlawptu zingah hian US leh EU ram hruaitu eng emaw zat an tel.