Jeremy-a’n youth world record a siam

Jeremy Lalrinnunga chuan nimin tlai khan Asian Junior leh Youth Weightlifting Championships-ah mellung pawimawh a phun leh ta. Mizo rawlthar duhawm hian 67kg category-a junior huangah silver medal a la a, youth huangah gold medal a la tel nghal bawk.

Pyongyang, North Korea-a inelna neihah Govt. Complex tleirawl hian snatch 134kg, clean & jerk 165kg, a vaiin total-ah 299 a chawi - a rit chawi hi junior leh youth atan hman nghal a ni. Jeremy hian Clean & Jerk-ah a record neih sa 163kg chu khumin 165kg a chawi. Snatch leh clean & jerk belhkhawm (total)-ah pawh 299kg a chawi a, ama record dinglai 297kg chu a khum. Mizo rawlthar hian clean & jerk bakah Total-ah Youth World Record a siam sa chu a khum ve ve  a ni.

Asian Junior bika silver medal a lak hi nakkuma neih tur Tokyo Olympic qualifier zinga chhiar tel a ni a, result ṭha a neih avangin Jeremy tan infiamna khawmpui liana tel theihna kawng a inhawng zel - hmabak erawh 

a la tam.

Tokyo Olympic 2020-ah chuan India hian mipa emaw hmeichhia emaw hmun ruak pahnih a nei dawn a, tuna an thlen chinah chuan Indian weightlifter zingah Jeremy aia record nei ṭha an awm lo, hliam leh harsatna dang a nei thut a nih loh chuan beisei a sang tawh viau.

Youth Olympic gold medalist Jeremy chuan, "Inelna kan hmachhawn dawn hian theihtawpin ka inbuatsaih ṭhin a, inbuatsaihna a vawrtawp a thlen lai chuan social media pawh ka khawih lo hial ṭhin, a hnua result neih ṭhat hian a hlu duh bik," tiin Vanglaini a hrilh.

Weightlifting huanga Jeremy hruailuttu SYS coach Malsawma Khiangte chuan, "Kan tum ram kan la thleng lo, chutihrualin tuna kan thlen chin hi kan bul ṭan laite ngaihtuah chuan a thui tawh hle," tiin a sawi ve bawk.

Olympic tak khel tur hi chuan inelna chi ruk tal hmachhawn a ngai a, tuna mi chhiar telin Jeremy hian inelna panga a hmachhawn tawh - khelh hmabak pathum a la nei; a hmasa ber atan December thla tir hian 13th South Asian Games chu Nepal-ah a khel leh ang.