Davis Cup-ah Nadal inlan dawn

Rafael Nadal chu November thlaa khelh tur Davis Cup-ah a inlan dawn. Mipa tennis team hmanga ram leh ram inelna lianah hian group B-ah Nadal telna Spain, Russia leh Croatia te an inhmachhawn ang. Inelna hi Madrid khawpuia neih tur a ni dawn.

World number 2 Nadal hi a banrek hliam vangin a chawl mek, tun hnaiah Shanghai Masters aṭangin a inhnukdawk hlim a ni. Tournament khel hnai lo mah se Grand Slam vawi 19 champion tawh hi inkhel tura a inpeih hman beisei a ni.

Spain tan hian Nadal bakah Roberto Bautista, Pablo Carreno, Feliciano Lopez leh Marcel Granollers te chu coach Sergi Bruguera kaihhruaina hnuaiah an inlan ang. Great Britain tan pawh Andy Murray chu 2016 hnua a vawi khat nan a inlan dawn. Captain Leon Smith chuan Murray leh Dan Evans te bakah doubles pair Jamie Murray leh Neal Skupski te chu an ram aiawh turin a thlang a ni.

Kum 2015 khan Murray hoin Britain hi an lo champion tawh a, a hnu lamah erawh an la hlawhtling leh rih lo. November 20-21 hian group stage-ah Netherlands leh Kazakhstan te nen an inhmachhawn ve thung ang.