MPL a hmuhnawm chho dawn

Mizoram Premier League Season 8 chu kar liam ta khan Kolasib-ah round 6 khelh a ni a, October 24 leh 25 hian Lammualah khelh chhunzawm a ni dawn. 

Aizawl FC coach Standly Rosario chuan, "Kan inkhel a danglamna chhan chu ground hi a ni a, ka naute khelh danah khan ka hlim. Ground ṭhaah chuan kan danglam," tiin FC Venghnuai 3-0 a an hneh zawhah Kolasib District Sports Stadium a fak. 

Round 7 aṭangin Lammual ground chul tawh takah an khelh chhunzawm dawn a, I League club tan Ramhlun North hi hneh saa dah a rem lo ang. Kolasib-a inkhel hmuhnawm bera ngaih Chhinga Veng leh Mizoram Police inkhel a ni a, Chhingcows-in 2-1 in hnehna an chang.

Police coach Lalbiaksanga Colney chuan, "Phaiah te kan inkhel ṭhin, hnam dangin hun khawhral nana an na der hi a thinrim thlak ṭhin khawp mai. Chhinga Vengin MPL-a an ti ve hi pawi ka ti a, sim rawh se," tiin Chhingcows khelh dan a sawisel a, an intum leh hun a nghahhlelh awm sawt.

BS-a Colney chuan, "Police team-in kan ti tak tak dawn," tiin a sawi zui a, Chhinga Veng nena an khel pawh a rorum viau tawh avangin Ningani zana FC Venghnuai nen an inkhel tur pawh en a châkawm tawh hle. Mizoram Police hi a sang pali zingah an awm tawh lo.

Chanmari FC-in coach S. Malsawmtluanga tel loin Chawnpui FC 3-2 in an hneh a, an ṭhatna emaw an chhiatna emaw hmuh tur a awm lo. Amaherawhchu, Zirtawpni zana Electric Veng FC an hmachhawn hunah chuan Ghanaian player Godwin Quashiga an chhawr thei dawn.

Kolasib-a inkhel ente mitthlaa cham reng tur chu ball thiam che vel a ni a, Electric Veng FC winger Ramhlunchhunga chevel a hmuhnawm. Angle awm tawh mang lo aṭanga a goal khung angin Chhunga hian a tinawn lo a nih pawhin a chevel hmuhnawm erawh a la kawl reng ang.

Chhinga Vengin Lalsawmzela leh C. Lalchungnunga te an kawl a, an pianpui thiamna leh an zir thiam chawhpawlh hmangin Mizo football tuite mit an la ti tlai chho zel dawn niin a lang.