Ballon d'Or Liverpool-in player pasarih an thawh

Khawvela mimal footballer chawimawina sang ber tia sawi ngam Ballon d'Or dawng thei tur hming 30 chhawpchhuah a ni a, Liverpool chu player thawh hnem ber an ni. 

European champion hian player pasarih ngawt an thawh a, Virgil van Dijk, Mohamed Salah, Sadio Mane, Roberto Firmino, Trent Alexander-Arnold, Georginio Wijnaldum leh Alisson te hming a lang. Premier League champion Manchester City chu player thawh hnem pahnihna an ni a, Raheem Sterling, Riyad Mahrez, Kevin de Bruyne, Bernardo Silva leh Sergio Aguero an thawh. 

Player langsar zingah Paris St-Germain forward Neymar, Manchester United midfielder Paul Pogba leh Tottenham Hotspur striker Harry Kane te an lang phak lo. 

Liverpool-in player pasarih an thawh zingah Virgil van Dijk hming a langsar a, kum 21 mi lek nichunga lang phak defender Alexander-Arnold hian fak a phu viau bawk. Champions League final meuh an thleng chunga lang phak lo Spurs striker Kane-a'n a la na viauin a rinawm a, goalkeeper Hugo Lloris leh Son Heung-min an lang lawi si. 

Club lian nia inngai zingah Manchester United-in player thawh an nei miah lo a, hei hian tun hnaia Red Devils dinhmun chiang takin a hrilhfiah. Real Madrid forward Eden Hazard a lang a, mahse Belgium international lan chhan hi Spanish club tana a khelh ṭhat vang ni loin season hmasaa Chelsea tana a hnathawh vang zawk a ni. 

FIFA Best Men's Player atana thlan Lionel Messi chu chawimawina dawng thei zingah a lang a, a elpui ber Cristiano Ronaldo a lang tel bawk - Ronaldo hi a zawna kum 16 chhung nominee-a a lanna a ni a, record a ni. Messi khelhna Barcelona-in player pali an thawh a, Argentine forward bakah hian Frenkie de Jong, Marc-Andre ter Stegen leh Antoine Griezmann an lang tel. 

Hriat tel atana ṭha erawh De Jong (Ajax) leh Griezmann (Atletico Madrid)-te hi season hmasa khan Catalan club tan an khel lo. Juventus tana Ronaldo khelhpui zingah Matthijs de Ligt chu lang ve awmchhun a ni a, mahse Dutch defender pawh hi season hmasa khan Ajax tan a khel. 

December 2 khian Ballon d'Or chawimawina hi semchhuah a ni dawn a, UEFA Player of the Year nilai VVD leh FIFA Best Men's player nilai Messi chu chawimawina dawng tura rinkai an ni. 

Nikum khan Luka Modric chuan Ballon d'Or hi a dawng a, kum sarih chhung zet Messi leh Ronaldo rorelna chu a titawp. Croatian midfielder hi kuminah erawh a lang phak ta lo. Ballon d'Or hi France Football magazine chuan kum 1956 aṭang khan an sem ṭan a, kum 2010-2015 inkar kha FIFA nen thawkdunin FIFA Ballon d'Or tiin an sem. 

Best FIFA Player Award leh Ballon d'Or bakah hian UEFA Player of the Year chu football khawvela chawimawina ngaihhlut a ni. 

Keeper ṭha 

Russia legend Lev Yashin hming chawia goalkeeper ṭha thlanna Yashin Award dawng thei tur zingah Premier League khel goalkeeper pali an lang a, Alisson (Liverpool), Ederson (Manchester City), Kepa Arrizabalaga (Chelsea) leh Lloris (Tottenham) te an ni. 

Premier League keeper pali bakah hian  Bayern Munich goalkeeper Manuel Neuer, Inter Milan chhuanvawr Samir Handanovic, Atletico Madrid rinrawl Jan Oblak, Ajax goalkeeper Andre Onana, Juventus keeper Wojciech Szczesny leh Braca ban rinawm Ter Stegen te an lang. 

Kum 21 hnuailam player ṭha bik thlanna Kopa Trophy dawng thei tur pawh chhawpchhuah an ni a, Borussia Dortmund winger Jadon Sancho, Juventus defender Matthijs de Ligt leh Atletico Madrid  forward Joao Felix te hming a langsar. 

Kopa Trophy dawng tur hi Ballon d'Or chawimawina lo dawng tawhten an thlang ṭhin a, European football-a khel mekte tana tih bik a ni. 

Manchester United an inhnehtawkpui hnu lawkah Reds-in chanchin lawmawm an hre zui a, Ballon d'Or dawng thei tur hming 30 chhawpchhuah zinga player pasarih thawh hi a namai lo. 

Player leh club phur vanglai takin Champions League match an khel zui dawn a, zanin dar 12:30-ah Genk an lenchilh dawn. Belgian club lakah chak an inbeisei ang. Liverpool hian an match hmasa berah Napoli an ngam lo a, match hnihnaah harsa takin Red Bull Salzburg an hneh zui. 

Zaninah Liverpool fan-ten inkhel hmuhnawm zawk hmuh an beisei dawn a, an match hnuhnung bera United laka an khelh anga an khelh chhuan karleha an tum tur Tottenham Hotspur lakah pawh an hmabak a êng chuang lo ang.