India-in South Africa an 'white wash'

India-in an mikhual South Africa lakah an chungnung zia an lantir a, nimin chawhma kha third Test ni lina chauh ni mah se Virat Kohli hote hian hnehna an chang.

Men in Blue hian Proteas lakah 3-0 in series an la a, an 'white wash' chiang hle. India-in innings ṭum li an neihah South Africa-in vawi khatmah vawm hlum kim an nei lo.

Third test hi October 19 aṭang khan Ranchi-ah khelh ṭan a ni a, India hi toss-ah chakin vuak hmasak an thlang. Opener Rohit Sharma 212 (212) leh Ajinkya Rahane 115 (192) te an chet ṭhat avangin chak tur a chiang titih nghal.

India hian inrintawkna an ngah a, run 497/9 an siam tihin an duhtawk. South Africa batsman-ten India bowler te an ngam lo, Umesh Yadav-a'n wicket thum a lak bakah Ravindra Jadeja (19/2), Mohammed Shami (22/2) leh Shahbaz Nadeem (22/2) ten wicket hnih ṭheuh an la.

South Africa hian run 162 bak an tlin lo a, 'follow on' pawh an pumpelh thei lo. Test match-ah hian innings hmasa ber zawha an inthlauhna hi run 200 a tlin chuan a bat hnuhnung zawk hi an bat chhunzawm thei a, chu chu 'follow on' an tih chu a ni.

Proteas tan hnehna chan a beiseiawm tawh lo a, chutihrualin an dam rei theih chuan draw theih dan kawng a inhawng thei thung. Amaherawhchu first innings ang thoin South Africa batsman ten India bowler te an ngam lo a, 48 overs-ah run 133 siamtirin an vawm hlum vek.

India-in innings khat leh run 202 in hnehna an chang a, tehfung hrang hrangah Men in Blue-in an chungnung fai vek.

Cricket-ah chuan series khata match thum a awm tlin a, match zawng zawnga hnehna an chang vek thei a nih chuan 'white wash' tih a ni.

India hi Proteas lakah kawng tinrengah an chungnung a, first Test-ah chiah Kohli hoten innings hnih luh an mamawh. Hetah pawh hian thi zo loin an declare ve ve a, second leh third Test-ah chuan innings khat dah bangin India-in hnehna an chang.

India captain Virat Kohli chuan, "Team chhunga awm zawng zawng ka chhuang takzet. Kan ramah a ni emaw mi ramah pawh ni se chak kan tum vek a, kan rilru put hmang a dik. Spin hi chu kan chakna a ni reng a, batting-ah kan buai ngai lo. Fast bowling-ah rawlthar ṭha an rawn chhuak a, Ishant chiah tawnhriat nei ṭha kan nei chungin an khel ṭha em em a ni," tiin an khelh dana a lungawi thu a sawi.