Australian Open roreltu Djokovic

Novak Djokovic chuan Dominic Thiem lakah set hnih a hloh hnua tho chhuak lehin Australian Open 2020 nomawi a chawi a, season khat chhunga Grand Slam khelh hmasak berah hian vawi riat champion tling tawhin record nei ṭha ber a ni.

Nimin tlai khan final en turin Rod Laver Arena-ah mipui 31,020 an pungkhawm a, nikum lama entu (30,753) khumin an tam ber ṭum a ni. Inkhel hmuhnawm takah player pahnih an inkhel tawk hle, tawnhriat ngah zawk Djokovic-a'n darkar thum leh minute 59 chhungin 6-4, 4-6, 2-6, 6-3, 6-4 in hnehna a chang.

Serbian tlangval hian Grand Slam nomawi 17 a chawi tling ta chiah, a chungah hian champion hnem ber Roger Federer (20 titles) leh Rafael Nadal (19) te an la awm a, player ropui pahnih dinhmun hi a sawi nghing phak tawh.

Melbourne Park-ah Djo­kovic hi champion lai ni mah se Thiem-a'n inelna a hman ṭhat bakah, world number 1 Nadal a hneh theih avangin champion tur zawk rin thiam a harsa. Austrian tlangvalin set hnih a lak hnuah phei chuan Djokovic tan hna a harsa tawh hle.

Mahse, inkhel boruak san vanglai takin kum 32 mi Djokovic a zam lo a, a pawimawh hunah tak point a hmu thei zel. Djokovic chuan, "Inkhel harsa tak a ni, ka khingpui kha a ṭha em em a, engtik niah emaw chuan Grand Slam nomawi a la chawi em em ang," tiin Thiem a fak.

World number 2 leh seeded pahnihna ni chungin Djokovic hian inelna a hmachhawn a, nomawi a chawi bakah Nadal-a'n quarterfinal a paltlang loh avangin tun kara ranking chhuak tharah chuan Serbian tlangval hi a chung berah a awm leh tawh ang.

Final thleng turin Djokovic-a'n court chhungah darkar 12 leh minute 29 hun a hman laiin, a khingpui Thiem erawhin darkar 18 leh minute 15 a hmang thung - darkar ruk chuangin a hmang hnem zawk tihna a ni, final inkhel tawp lamah a chau zawk tih a lang.

Mipa tennis thuneitu sang Association of Tennis Professionals chuan final khelh hmain champion tura mipui rinkai zawhna an siam a, vote 69,300 chuang tla zingah  56% chuan Thiem an ring; 44% chauhin Djokovic an ring thung.

Mipui rinkai ni chunga inlan, kum 26 mi Thiem a chak zo lo, seeded pangana hian tun hmain French Open final-ah ṭum hnih Nadal a ngam lo, tun ṭumah pawh hun ṭha nei mah se a bawhpelh leh, player ṭha tak a ni tih chu a chiang. Chutih rualin rilru huaisenna leh dawhtheihna a la mamawh hnem tih a hriat theih.

•    Ṭhum vawra vannei Djokovic-a'n ser­vice hmasak a thlang, awlsam takin game hmasa ber a lak bakah Thiem ser­vice chhuhsak zuiin bul a ṭan fuh hle.

•    Djokovic-a'n 4-2 a hma a hruai hnuah service a hloh, 4-4 in an inrual leh.

•    Serbian tlangval a chefuh chhunzawm, 5-4 a hma a hruai hnuah a khingpui service a chhuhsak leh. Thiem-a'n holam taka set point a pek bakah double fault vangin set a hloh.

•    Set khatna game hnuhnung ber bikah Thiem zawkin a thihsual vangin point ruk ngawt a hloh.

•    Djokovic-a'n set hnihnaah a service hmasa zui a, game khat ve ve an lak hnuah a hloh; Thiem zawkin service hum zuiin 3-1 in hma a hruai. Mahse, Djokovic tho chhuak lehin 4-4 in an inrual. 

•    Thiem zawkin set la turin a break nawn leh a, minute 49 chhungin set hnihna chu 6-4 in a la.

•    Set thumnaah Djokovic service chu chhuhsak nghal a ni, Austrian tlangvalin 4-0 in hma a hruai fal; harsa lutuk loin 6-2 in set a la zui.

•    `Djokovic-a'n set linaah service hmasain game hmasa a la, 4-3 a hma a hruai hnuah a break sak, 5-3 in a fal hnuin 6-3 in a la.

•    Set hnih ve ve an la, set ngana khelh chhunzawm a ni.

•    Thiem-a'n service hmasain game a la, 1-1 a nih hnuah Djokovic zawkin a break sak; 5-4 a hmahruaitu Djokovic tan 'Serving for the Championship'.

Thiem-a'n point hmasa ber hmu mah se a tawpah a zawna vawi thum unforced errors a neih avangin Serbian tlangval a champion.