Venghnuai hmaah Police thinrim
Mizoram Police-in Kolasib-ah Chhinga Veng an hneh lo a, Lalbiaksanga Colney hote match hnih a zawna an chak loh bakah Mizoram Premier League Season 8-ah vawi thum an chak lo tawh.
Zanin dar 7:00 hian Police-in MPL kaithar FC Venghnuai an hmachhawn dawn a, tun hnaia result nei ṭha lo pahnih inkhel hi a hmuhnawm dawn.
Pressure a sang
Mizoram Police-in recruitment lian tham an neih hnua kim ṭhapa MPL an hmachhawn hmasak ber a ni a, hotu lam aṭangin pressure an pe na tih an khelh dan hmangah a lang chho ṭan. Chhingcows lakah pawh player 10-a khel chungin Police-in na takin an nawr a, 'chak loh duh lo' an tih ṭhin Police an rawn inlar ta. Inkhelh banah an chak lo tih hriat takin hlim hmel an pu lo a, inelna an la thutak tih a chiang a, hei vang hian FC Venghnuai nena an inkhel tur hi en a châkawm sawt.
Police coach BS-a Colney chuan, "Inkhel turin kan inpeih. FC Venghnuai tum hlan kan nghakhlel," tiin point thum hmuh ngei a tum thu a sawi. Venghnuai hian I Day Football final an thleng a, MPL-ah a sang pali zinga awm phak loh avangin pressure an nei ṭan. Tun dinhmunah MPL kai thar hi a zawnin match hnih an chak tawh bik lo. Coach Rindika Hmar chuan, "Kan pawisa hman dan thlirin tuna kan awmna hi table-a awmna tur awm vel chu a ni a, mah se hei aia sang awm tumin kan bei ang," tiin a insawifiah.
Sa huai ser dawn
Police-in Chhinga Veng an hmachhawn ṭumin F. Lalrinpuia (Valpuia) leh Lalsangbera te bench-ah an ṭhuttir a, Venghnuai nen erawh Malsawmfela, Valpuia leh Sangbera te hmuh tur an awm nghal dawn. Ball sem turin R. Malsawmtluanga a rawn let leh thei tawh dawn a, goalkeeper-ah F. Lalmuanawma a inlan tawh dawn.
Hrem vangin captain Lalfakzuala khel thei dawn lo mah se Police-in match ṭan phat aṭangin an sa huai neih ang te an ser dawn. Kolasib mipuiin Sawmfela thiamzia an hmu a, MS-a'n a chawm phei chuan a ṭhatna belhchhahin a awm ngei ang.
FC Venghnuai pawhin Aizawl FC lakah an tihsual an hria a, an team dinhmun an hre fuh tawh. Hei vang hian ṭan phat aṭanga mawl mang taka nawr loin remchang a awm chauhin counter attack hmangin an nawr dawn. Rindika Hmar chuan, "Keini aia player tawnhriat ngah leh tharum ngah an nih avangin game plan mumal tak nen kan hmachhawn ang," tiin an fimkhur tur thu Vanglaini a hrilh.
MPL kai thar tan I Day Football-a final an thlen theihna chhan Vanlalthanga chu goal nawr kawngah a pawimawh dawn a, goal venhim kawngah goalkeeper RS Lallawmzuala mawhphurhna a sang ang.
Engtin zel?
Mizoram Police-in ṭantu an nei ṭha tawk lo, chak tura rinkai zawk ni mah se player 12-na nei ṭha zawk FC Venghnuai laka chesual thei reng an ni. MPL8-a ṭantu nei ṭha ber zinga mi Venghnuai mipui an thawhchhuah chuan inkhel result a dang thei ang.
Police hi an chak lo a nih chuan tuna an awmna pangana aṭangin paruknaah an tawlh thla dawn a, FC Venghnuai tan pawh semifinal beisei chhunzawm tur chuan point hloh a thiang lo.
Goal hnih aia tam khung tawhte
Hming Club Goals
MC Malsawmzuala Chhinga Veng 5
Ouattara Sie Chhinga Veng 3
Lalnumawia Chawnpui FC 3
Ramhlunchhunga Electric Veng FC 3