Man City lawm a kim lo

Manchester City chuan Thawhlehni zan khan Atalanta chu Etihad Stadium-ah 5-1 in an sawp. Pep Guardiola hote hi kumin Champions League match thum an khelh tawhah chak vek mah se Rodri inhliam vangin an lawm a kim lo.

Premier League champion hian ṭan aṭangin team ṭha zawk an ni tih an lantir a, mikhual Atalanta-in minute 28-naa Ruslan Malinovskiy penalty hmangin an khung hmasa thung.

Atalanta goal khatin Man City a fuih phur a, minute 10 chhunga Sergio Aguero goal hnih hmangin English club-in an lehthal. Second half chu Raheem Sterling 'show' a ni ber a, Man City forward hian hattrick a siam. Minute 11 chhung leka goal thum khung thei Sterling a puitling ta hle.

Pep Guardiola chuan Italian club hmachhawn turin midfielder Rodri chu tlarhnungah a dah a, a kawppui pawh midfielder Ferandinho a ni. Rodri hi malpui hnunglam (hamstring) hliam vangin lakchhuah a ṭul. Rawlthar duhawm Phil Foden pawh minute 82-naah yellow card vawi hnihna a hmuh avangin a career-a a vawi khat nan hnawhchhuah a ni bawk.

Man City hian tlarhnunga an innghahna Aymeric Laporte an chan tawh a, chutihrualin second half-ah Nicolas Otamendi leh John Stones te an inkawp theih avangin Pep-a tan harsatna lian tham a awm rinawm loh. Spanish manager Pep Guardiola chuan, "Pawisa kan chawitir ang maw? Chawitir lo e. Player hian thil atthlak tak an tih loh chuan hrem a ṭul lo. A khelh danah ka lawm a, yellow card hmuh hnuah erawh a fimkhur a ṭul," tiin Phil Foden chungchang a sawi a, Rodri hliam chu a nat dan a zirin thla khat thleng pawh a chawlh theih thu a sawi tel bawk.

Group C inkhel dangah Shakhtar Donetsk leh Dinamo Zagreb te 2-2 in an inhnehtawk a, Man City hian point kua an hmuh tawh avangin second round lut turin an dinhmun a ṭha hle.