Chawnpui lakah Chhingcows-in risk la dawn

Vawiin tlai dar 4:00 hian Lammualah Mizoram Premier League Season 8 khelh chhunzawm a ni dawn a, Chhinga Veng leh table mawngphaha awm Chawnpui FC an inhmachhawn ang.

Chhingcows hian 'risk' lain  squad siksawina remchangah an hmang dawn a, Chawnpui tan point hmuhna remchang a ni thei thung.

Chhinga Veng hian squad an siksawi dawn nachungin player lut turte an la ṭha dawn. Foreign striker Ouattara Sie a awl a nih pawhin a aia lut turin top scorer ni mek goal nga khung tawh MC Malsawmzuala an kawl.

Police an hneh ṭuma bench-a ṭhu Lalmawizuala lah Khelo India Under 21 leh Dr T Ao Memorial Trophy (U21) a Mizoram captain a ni a, midfielder F. Zosangliana lah Mizoram Police-a rinrawl ni ṭhin a ni. Tlarhnungah Lalmuanawma a lut a nih pawhin MPL ngainatute chuan C. Muana bul ṭan hi mak an ti lo ang, bench-a an dah ṭhin hi an hrethiam lo hial zawk ang.

Chhinga Veng coach Anand Gurung chuan, "Kan insiksawi a ṭul. MPL hi round 14 khelh a ni a, player ngai reng kan chhawr thei lo. Kan player-te hi inhliam thei, chau thei an ni. Hei aia pawimawh zawk chu kan player-te hi an vaiin an discipline a ṭha a, inkhel tlak vek an ni," tiin an ṭhat dan ngai renga an ṭhat a beisei thu a sawi.

Chawnpui FC coach HC Zarzoliana chuan, "Point hmuh hrim hrim kan duh a, hei vang hian tlarhnung pawh kan thuam chak ang. Chak theihna remchang a awm a nih phawt chuan bawhpelh kan tum lo," tiin Vanglaini a hrilh ve bawk.

Chawnpui hian goal khungah harsatna an nei lo a, Chanmari FC lakah pawh goal hnih a khung. An player neih dan en pawhin tlarhmaah Lalnunmawia, Vanlalthlamuana leh T. Lalnunpuia (Bawihpuia) te an awm a, mimal ang pawha danglamna thlen thei vek an ni.

Zara enkawl Chawnpui hian match ruk khelh tawhah point khat chauh an la hlawh chhuak a, Chhinga Veng nen an theihna zawng zawng an chhuah ang.