Spurs an tho chhuak ta

Tottenham Hotspur chuan Champions League-ah an theihna an pholang ta a, Thawhlehni zan khan an mikhual Red Star Belgrade chu 5-0 in an sawp. Group B inkhel dangah Bayern Munich-in Olympiakos 3-2 in an hneh a, point kua hmu tawh German champion hi knockout stage lut turin an dinhmun a ṭha hle.

Spurs hian UCL match hmasa pahnih aṭangin point khat chauh an hlawh chhuak a, point thum hmu tawh Red Star Belgrade lakah zahngaihna an lantir lo. English club tan Harry Kane leh Son Heung-min ten goal hnih ve ve khungin Erik Lamela-a'n goal khat a khung bawk.

Mauricio Pochettino chuan, "Result ṭha nei turin nitinin ka theihna 200% ka pe dawn. Spurs ṭantute hian min hmangaih tih ka hria a, kei pawhin ka hmangaih tih hi result hmanga lantir ka duh a ni," tiin a sawi. Tottenham hian Premier League lamah pawh bul an ṭan ṭha lo a, match kua khelh tawh aṭanga point 12 chauh an hmuh avangin pasarihnaah an awm mek. Poch chuan, "Tuna kan result hi kan tan chi hnihin a pawimawh. Inrintawkna leh point thum kan neih nan a pawimawh takzet a ni," tiin a sawi.

English club tana chanchin lawmawm chu Harry Kane leh Son te an khel ṭha a, Dele Alli-a'n midfield a luahlum ṭha. Season tawp ruala contract tawp tur Christian Eriksen erawh bench-ah a ṭhu tluan a, Dane midfielder hmalam hun hriatthiam a la har hle.

Tottenham hian tun Pathianni zan dar 10:00 hian league hmahruaitu Liverpool hmachhawn turin Anfield an tlawh dawn a, goal nga zeta an chak avangin Premier League inkhel hian ngaihven a hlawh sawt ang.