Fury inpuanna - a promoter a thinrim

British boxer rothap Tyson Fury chuan WWE-a Braun Strowman a hmachhawn tur chungchangah a promoter, trainer leh a pa te chuan thu an pek lawk thu a sawi a, Deontay Wilder nena an inhnek tur tihchian a nih hma chu WWE-a lut rih lo turin an ti. 

Mahse, Fury a awm reng thei lo. WWE-ah a inlan a, a promoter Frank Warren chuan media kaltlangin Fury chanchin a hre ve chauh! Kum 31 mi Fury chuan, "Frank chu lawm lo tak a ni. 'Thil ṭul lo tak i ti a nih hi,' tiin min hau. Amah chauh a ni lo, ka team-a mi zawng zawngte chuan, 'Movie star i ni lo a, i hna chauh ngaihtuah rawh,' min ti a ni," tiin a sawi. 

Otto Wallin nen an inhnekna avanga a mit ko kak pawh la dam chiang lo Fury hi Frank chuan a inhliam belh a hlau a, a awm lo hran lo. Mahse, Fury ngaihdan a dang thung. Saudi Arabia-a Strowman hmachhawn tur chuan, "Chumi khami chu thleng ta se, 'ta se' tih ringawt kan ngaihtuah chuan engmah kan ti thei nang. Hetiang hun ṭha bawhpelh hi a hlauhawm a ni," tiin WWE-a a inlan tur chhan a sawi. 

Fury leh Braun Strowman hi October 31-ah an inhmachhawn dawn a, khawthlang media lamin an tarlan dan chuan pound maktaduai kua vel a hlawh dawn a ni. Vawi 30 inhnek a hmachhawna la tlawm miah lo Fury chuan WWE chu thil tak tak a nihzia sawizuiin, "Mi tam takin 'a lem' tiin an sawi ṭhin a, a lem a nih leh nih loh chu rawn fiah rawh se. Ring chhungah min paih kual a, thirlen nek ang mai ka ni a, har ka ti takzet. Chutihrual chuan tawnhriat duhawm tak a ni bawk si," a ti. 

Fury hian February 22-ah WBC world heavyweight champion Wilder a hmachhawn dawn a, mahse Americn boxer hian November 23-a Luis Ortiz a hmachhawn huna hnehna a chan phawt a ngai thung.