Jerry Mawia 'mawina' a tawk zo lo

Mizo rawlthar Jerry Mawihming-thanga'n Indian Super League-ah a thiamna pholang mah se a club thar Odisha FC a chakpui zo lo a, a club hlui Jamshedpur FC lakah 2-1 in an tlawm. 

JFC hian minute 12-na lekah defender Rana Gharami 'own goal' hmangin hma an hruai a, mahse an hlim chhung a rei lo. Minute 35-na lekah Bikash Jairu chuan goal hmaa tlang chiang tur Jerry Mawia a kalh thlu a, hnawhchhuah a ni. 

Minute nga hnuah Aridane Santana chuan Odisha tan si phurh a rawn sut a, JRD Tata Sports Complex, Jamshedpur-a mipui 21,689 pungkhawm thawm a reh duk. Mahse, hun tawp nan minute nga chauh a awm tawh tihah Jamshedpur-in Atletico Madrid aṭanga loan-a an hawh forward Sergio Castel chuan chakna goal a rawn khung a, 2-1 in JFC an chak. 

Minute 90 chhungin Jerry a hmuhnawm tluan chhuak zak a, minute 10-naa a cross ṭha lutuk  Aridane Santana-a'n a tauh luh loh te, ṭha taka ball a luhpui hnua crossbar a pet perte chu Mizo tlangval tan uiawm a tling. JFC-ah hian Isaac Vanmalsawma chuan bench lamah hun a hmang tluan a, Odisha tan Daniel Lalhlimpuia'n khelmual a rap bik lo. 

Zanin dar 7:30-ah inkhel a awm leh dawn a, Samuel Lalmuanpuia leh Lalruatthara (inhliam) te khelhna Kerala Blasters chuan Hmingthanmawia (Valpuia) khelhna Mumbai City an mikhual ang.