Hazard nil; Mbappe 3; Dybala 2

Cristiano Ronaldo meuh thlak tura Real Madrid-in an lakluh Eden Hazard-a'n goal ruakah a pet lut thei lo a, mahse Toni Kroos goal khung hmangin Spanish club hian Galatasaray chu 1-0 in an hneh tho. 

Madrid khaw club dang inkhelah Álvaro Morata chuan Atletico Madrid tan goal awmchhun a khung a, an mikhual Bayer Leverkusen chu 1-0 thoin an hneh ve bawk. Paris St-Germain tan Kylian Mbappe chuan hattrick a siam a, Real Madrid inhnehtawkpuitu Club Brugge chu khualmualah 5-0 ngawtin an sawp. 

Nipui laia Juventus-in chhuahtir an tum Paulo Dybala chuan Italian club-in an la mamawhzia khelmualah a pholang a, an mikhual Lokomotiv Moscow an hnehna inkhelah goal hnih a khung. 

Real-in an league match hnuhnung berah Real Mallorca an ngam lo a, Champions League group A-a an match hmasa pahnihah an chak zo lo bawk. 

Result duhawm lo avangin manager Zinedine Zidane dinhmun a derthawng niin an sawi a, Spanish media te chuan Istanbul-ah hian an chak zo lo a nih chuan French manager hi ban a nih tur thu an sawi. Minute 18-na lekah Kroos chuan a pu hi chhanin goal a rawn khung a, Champions League-a match 100 a khelh tlinna chu goal nen a lawm - Real hi hahdam zawka chak thei an ni a, mahse Hazard chuan pen ruk vel lek aṭangin goal ruakah a khung lo!

Turkish champion Galatasaray-in goal khungna remchang nei ve mah se Brighton aṭanga an hawh  striker Florian Andone-a shot chu Thibaut Courtois chuan vawi hnih ngawt ṭha zetin a dansak a, Steven Nzonzi chuan hnai set sawt aṭangin a hlah bawk - Real hian match thum aṭangin point li an nei ta. 

Paris St-Germain-in Club Brugge khelmuala hnehna chang turin harsatna an nei lo - bench aṭanga luhtir Kylian Mbappe chuan hattrick a siam a, November-a Belgian club an mikhual ve huna point khat an hlawhchhuah chuan last 16 an lut ang. 

French club tan hian Inter Milan aṭanga an hawh Mauro Icardi chuan minute sarihna lekah Angel di Maria siamsak aṭangin goal hmahruai a khung a, a bak zawng erawh Mbappe channa a ni. Minute 52-naa luhtir striker hian khelmualah minute kua hun a hmang hman ṭawk tihin goal a khung der a, minute 63-naah Icardi khung tur a siamsak zui. 

French striker hian minute 79 & 83-naah a khung leh a, hattrick a siam - Villarreal forward Joseba Llorente chuan October 2008 hnua Champions League-a substitute-in hattrick an siam lehna hmasa ber a ni. 

La Liga lamah result nei ṭha lo mah se Atletico Madrid-in Champions League-ah chuan tawh an la khirh reng tih an pholang a, an mikhual Leverkusen chu 1-0 in an lo hneh. 

Atletico tan substitute Alvaro Morata chuan he inkhela goal awmchhun hi minute 78-naah a khung a, point hawn tura inngai Leverkusen-in a chhanletna tur an nei hman lo. Diego Simeone naute hian UEFA hnuai inelnaa an record duhawm an chhawm nung zel a, European football-ah match 12 chhung chu a zawnin an khelmualah an tlawm ta lo - record ropui a ni. 

Atletico hian match thum an khelh aṭangin point sarih an nei ta a, Spanish club hian last 16 an mitthla ṭan a nih pawhin a awm lo hran lo. 

Juventus-in nipui transfer laiin Paulo Dybala chhuahtir an tum a, Argentine forward hian Tottenham Hotspur leh Manchester United pan teuh viau mah se Turin khawpuia cham turin thutlukna a siam. 

Nipui laia Juve mamawh loh kha Champions League-ah an mamawh chhanna a lo ni reng a, Argentine striker hian goal hnih a khung. Juventus Stadium-a inkhelah rin loh takin Lokomotiv zawkin Aleksei Miranchuk hmangin goal hmahruai an khung a, Juve ṭantu ten Cristiano Ronaldo lam an hawi. 

Mahse, tun season-a beisei anga la khel chhuak lo Dybala chuan a thiamna a la theihnghilh lo tih pholangin goal hnih a rawn khung a, hmun himah Juventus a khai chhuak - 2-1 in hnehna an chang.