Zanin dar 7-ah Chanmari Vs Electric Veng

Mizoram Premier League Season 8-ah Chanmari FC leh Electric Veng FC ten point 11 ve hmuin khelh tawh chinah an intluk tawk hle. Zanin dar 7:00 hian team ṭha pahnih hi Lammualah an inhmachhawn dawn a, round 7 inkhel hmuhnawm ber tura ngaih a ni.

Kumin MFA Super Cup semifinal-ah Chanmari FC leh Electric Veng FC te 1-1 in an inhnehtawk a, penalty shootout-ah Chanmarians 5-3 in an chak. Coach Lalsangzuala Hmar chuan, "An hnuaiah kan awm reng lo ang," tiin inkhelh banah a sawi a, I Day Football-ah Electric Veng hian 3-1 in Chanmari hi an hneh let. Zanin hian tun season-a a vawi thum nan an inhmachhawn dawn.

Electric Veng coach Lalsangzuala Hmar chuan, "Chanmari hi champion thei pahnih zinga pakhat an ni. Chanmari hian Electric Veng player zingah Dinpuia tih loh hi chu an duh ka ring lo," tiin team pahnih inthlauh thu a sawi.

Defender PC Laldinpuia hi MPL best defender ni lai a ni a, Electric Veng hian Chhinga Veng aṭangin an lalut. Sanga chuan sawi chhunzawmin, "Team ṭha lo zawk kan nih avanga kan vanneihna chu pressure kan nei ve lo. Kan ṭhat dan berin kamtu nei miah loin kan khel ang," tiin an khingpuiten pressure an ngah zawk thu a sawi.

Electric Veng hian Kolasib-ah Ramhlun North 4-0 in an sawp a, Chanmari FC-in Chawnpui FC 3-2 in an hneh. An match hnuhnung ber result aṭang chuan Electric Veng hi an hniam bik lo tih a chiang.

Chanmari FC-in coach S. Malsawmtluanga thlakna an la nei lo a, CYMA Football-a Chanmari champion puitu Samuel Lalrinzuala Sailo-in team enkawl hna a chhunzawm ang.

Chanmari ṭantu tan chanchin lawmawm a awm a, an foreigner thar Godwin Quashiga-a'n Electric Veng lakah bul a ṭan nghal dawn. Ghanaian player chungchang sawiin Sanga chuan, "Chhinga Vengah khan ka enkawl tawh a, kan sum dinhmunin zir se Electric Vengin kan la hmasa lo ang tih a sawi theih loh. Chanmari hian an ṭhatpui ngei ka ring a, danglamna thlen thei player a ni," tiin Chanmari player thar a fak.

Kolasib-ah Chanmari FC-in goal thum an khung hnuah goal hnih an chhuah leh avangin nuam sain an chak lo a, Godwin hi goal venhim kawngah hna pawimawh chelhtir nghal a ni ang. Chanmari manager Lalhmangaiha Sailo (Angaiha) chuan, "Kan phur chho zel. Electric Veng nena kan inkhel tur hi a pawimawhzia kan hrechiang a, entu lam thlengin kan tam ang," tiin Vanglaini a hrilh a, Electric Veng hneh ngei an tum hle.