Chelsea-in Ajax an hneh

Nilaini zan khan Chelsea-in Dutch champion Ajax chu minute 86-naa Michy Batshuayi goal hmangin 1-0 in an hneh.

Frank Lampard hote hi Champions League group H hmahruaitu an ni a, Ajax nen point ruk ve ve an hmu. Inkhel dangah Lille chu injury time minute nganaa Nanitamo Ikone goal hmangin Valencia nen 1-1 in an inhnehtawk.

English manager Lampard hian rawlthar player chungah rinna a nghat a, hlawhtlinna a hmu chho zel. Amsterdam-ah team pahnih an intluk tawk a, Ajax-in Quincy Promes hmangin first half-ah goal khung hmasaah an inngai. Amaherawhchu, VAR hmanga ennawn a nih hnuah 'centimetre' tlem tein a ke a pawng - pawmsak an ni lo.

Second half-ah pawh Ajax midfielder Edson Alvarez-a'n goal ban a tauh per a, danglamna thlentute erawh Lampard-a substitution siam a ni. Bench aṭanga lut  Christian Pulisic chuan Batshuayi a siamsak a, Belgian forward hian chakna goal khung nan a hmang.

Minute 71-naa lut Batshuayi hian a luh aṭanga minute hnih lekah hnai tak aṭangin a pet over a, chance ṭha bik a hlah avangin mualpho hman mah se chakna goal hian inkhelh bana an sawi zui dan a tidanglam vek. Lampard chuan, "Kan khelh dan kha kawng tinrengah ka lawm. Champions League-a an khelh zat aṭanga thlir chuan ka player-te hi naute chauh an ni a, team ṭha tak Ajax lakah fiahna an paltlang," tiin nikum Champions League semifinalist Ajax an hneh avangin a naute a chhuang hle.