ISL-ah Chennaiyin an zawr

Season hmasaa beisei an phak loh hnuin Chennaiyin FC an insiamṭha lo a, tun season Indian Super League-a an match hmasa berah FC Goa chu 3-0 in an ngam lo. 

Goan club tan Seiminlen Doungel chuan a club thar tana a match hmasa berah goal a khung nghal a, season hmasa ISL top scorer Ferran Corominas chuan a hna ngai rawn thawkin an goal hnihna a khung bawk. 

Hun tawp nan minute kua chiah a awm tawh tiha Carlos Pena-a'n goal a khung leh meuh chuan chak tur a chiang tawh a, Chennaiyin tan thawh ngaihna a awm tawh lo. Lallianzuala Chhangte chuan Chennaiyin tana a match hmasa ber khel mah se hriatreng tlak a ni lo a, chance a neih vawi hnihah goal a khung thei lo ve ve. 

Chennai club tan Jerry Lalrinzuala chuan bul a ṭan bawk a, Laldinliana Renthlei erawhin bench lamah hun a hmang tluan thung. Jeje Lalpekhlua'n dam lam pan mah se November hma chu a inlan thei dawn lo a, Chennaiyin tan ngaihawm mai a chang rih. 

Zotea Ralte pawh a pa thihna avangin Mizoram lamah a awm rih a, South Indian club tan a la inlan thei lo. Goa hian forward Lalawmpuia an kawl ve bawk a, mahse Ramhlun South tlangval hi Chennai club an mikhualna squad-ah a tel rih lo. 

Zanin dar 7:30-ah Indian Super League khelh chhunzawm a ni dawn a, Malsawmzuala, Ricky Lallawmawma leh Sena Ralte khelhna ATK chuan Laldanmawia Ralte club thar Hyderabad FC an mikhual ang.