Irving-a point 50 a tawk lo

Nimin zing NBA regular season inkhelah Kyrie Irving chuan Brooklyn Nets tana a match hmasa ber a khel a, point 50 ngawt nei thei mah se Minnesota Timberwolves lakah 127-126 in an chak lo.

Kum 27 mi Irving a khel ṭha a, club thar tan ṭha takin bul a ṭan. Mahse, hun tawp dawnah chakpui theihna hun a neih laiin a shot chu a ṭhelh a, hun hlu bik a hman ṭangkai loh avangin duhthusam a famkim ta lo a ni. Irving hian July thla khan Boston Celtics atangin Nets hi a zawm a, match khata point neih hnem lamah pasarihna ni nghalin hnuhma a siam hrawl nghal hle.

Match khatna bikah chuan record nei ṭha a ni. Kiki Vandeweghe chuan 1984 October thla khan Portland Trail Blazers tana a match hmasa berah point 47 a lo nei tawh, tunah Irving hian a rawn khum chiah.