Srikanth leh Kashyap chak lo

Badminton French Open khelh laiah India tlangval an che fuh lo. Nilaini zan khan Kidambi Srikanth leh Parupalli Kashyap te chuan an match hmasa ber khelin an chak lo nghal ve ve, hmeichhe lamah Saina Nehwal erawhin second round a inhlangkai thung.

World number 1 hlui Srikanth hi Chinese Taipei tlangval Chou Tien Chen nen minute 55 an inkhelh hnuah 15-21, 21-7, 21-14 in a chak lo. Inkhel dangah Kashyap chu Hong Kong tlangval Ng Ka Long Angus lakah 11-21, 9-21 in a chak lo bawk.

India tlangval dang Sameer Verma pawh 22-20, 18-21, 18-21 in Japanese shuttler Kenta Nishimoto lakah chak loin first round-ah a zin kawng a tawp ve bawk. Mixed doubles lamah pawh result a danglam chuang lo, Satwiksairaj Rankireddy leh Ashwini Ponnappa te inkawp leh, Pranaav Jerry Chopra leh N Sikki Reddy te ṭangdun chu an chak lo.

Mipa lamin beisei phak lo mah se Saina Nehwal erawh a danglam. London Olympic bronze medalist hian a match hmasa berah Hong Kong nula Cheung Ngan Yi chu minute 42 chhungin 23-21, 21-17 in a hneh.