Messi record nen Barca chak

Lionel Messi chuan a dam chiang tawh tih pholangin goal khung a chhunzawm zel a, record-in a zui zel bawk. 

Argentine forward hian Nilaini zan khan Champions League-ah Slavia Prague a hmachhawn a, goal a khung - Catalan club-in 2-1 in hnehna an chang a, Messi hi Champions League season 15 chhung a zawna goal khung thei hmasa ber a ni zui. 

Messi hian inkhel ṭan aṭanga minute thumna lekah goal hmahruai a khung a, Barca laka chak tum ngam Slavia-in minute 50-naah an phu ang ngeiin si phurh an sut - Czech champion tan hian Jan Boril chuan a khung. Mahse, Catalan club-in khualmualah tlawm an tum lo. Messi bawk a lo inlar a, a free kick pet chuan Luis Suarez a zawng hmu. Uruguayan striker hian a chance neih a pet nghal a, he cross-shot hian Peter Olayinka perin an lamah a ti lut. 

Barcelona-in hnehna an chan avangin match thum an khelhah point sarih an nei a, group F-ah hmahruaitu an ni mek. An hnuaiah hian 2-0 a Borussia Dortmund ngamtu Inter Milan an awm a, Italian club leh Dortmund hian point li ve ve an nei. 

Antonio Conte enkawl Inter tan hian tun laia striker 'hot' ber pawl Lautaro Martinez chuan goal hmahruai a khung a, penalty a hlah bawk! Mahse, Marco Reus tel loa khel Dortmund-in an chhanglet thei lo a, Antonio Candreva chuan goal khat dang khung ve lehin 2-0 in Inter Milan an chak.