Quarterfinal-ah Federer a lut

Roger Federer chuan an khua a inelna neih lai Swiss Indoors-ah quarterfinal a lut a, semifinal lut tur chuan Stan Wawrinka leh Frances Tiafoe te inkhela chak zawk a paltlang leh a ngai ang.

Nilaini zan inkhelah Federer hian Radu Albot chu 6-0, 6-3 in a sawp, hnehna chang tur hian darkar khat leh minute hnih bak a mamawh lo - Basel khawpuiah hian a vawi 10 nan champion leh a tum mek.

World number 3 Federer-a'n tun hnai kum nga chhung chu an khuaah hian vawi li ropuina a chang a, a match hmasa zawkah Peter Gojowczyk chu minute 52 chhung lekin a lo sawp tawh bawk.

Inkhel dangah British number 1 Dan Evans chu American tlangval Tiafoe lakah 6-4, 6-2 in a chak lo a, kum 21 mi Tiafoe hian a khingpuiin break point vawi sarih a hmuh zinga paruk a inchhanhim theih avangin a chungnung zawk.

Champion tura rinkai zinga mi Wawrinka chuan Pablo Cuevas 6-3, 6-4 in a hneh ve thung. US Open champion hlui Marin Cilic erawh a chak lo, Croatian tlangval hi seeded parukna David Goffin lakah 6-4, 6-4 in a chak lo.