Liverpool khelmualah harhna chang Spurs

Pathianni zan dar 10:00-ah Anfield-in Premier League match hmuhnawm en tur a nei dawn a, Liverpool chuan Tottenham Hotspur an mikhual dawn.

Liverpool hi match riat zet a zawna an chak hnuin Manchester United-in Old Trafford-ah an chelh a, Tottenham Hotspur an hmachhawn dawn zui. Mahse, Premier League karah Champions League a a tla zep a, Liverpool-in 4-1 a Genk hnehin an insiamṭha lehnghal. 

Reds ṭantute tana hriat nuam lo erawh Spurs-in harhna an chang ve kher hi a ni. London club hian Champions League-ah 5-0 in Red Star Belgrade an hneh ve tho. 

Liverpool-in Spurs an hmachhawn hmain chanchin lawmawm an dawng a, damlohna avanga Genk hmachhawn thei lo Trent Alexander-Arnold a dam tawh. 

He thu buatsaih a nih thleng hian Joel Matip dinhmun a la chiang lo a, hliam tenau nei defender hi dam hman turah erawh ngaih a ni. Genk laka an hmun ruak luahtu James Milner leh Dejan Lovren ten an khelh chhiat loh avangin player pahnih hi dam hman lo pawh ni se Klopp tan buaina tur awmin a lang lo. 

Genk laka lakchhuah ngai Andy Robertson-a'n Spurs hmachhawn tura a dam ṭhat tawh thu a sawi a, Joe Gomez a la awm cheu bawk. 

Season hmasaa team hmuhnawm Tottenham Hotspur-in beisei an phak lo a, match kuaah vawi thum chiah la chakin point 13 an nei. 

Premier League-a an match hnuhnung berah pawh vannei takin Watford chu 1-1 in an inhnehtawkpui a, season hmasaa team hmuhnawm tak kha an ni ta lo em ni aw, tih awl tak a ni. Mahse, he team hian Red Star lakah an thiam an la theihnghilh lo tih pholangin goal nga an khung a, goal hnih khungtu pahnih Harry Kane leh Son Heung-min hi Reds tan ven uluk an ṭul dawn. 

English striker Kane-a'n season a hmang ṭha lo an tichungin match 12-ah goal riat a khung tawh a, a 'form' ṭan leh tak bawk si avangin tawh a khirh dawn. 

Tun hnaia team pahnih inhmachhawn tur chungchangah Champions League-a an result hnuhnung ber sawi rik a ni nasa a, Jurgen Klopp-a ngaihdan a ni lo. 

Liverpool boss chuan, "Red Star Belgrade kan ni lo a, chutiang chiah chuan Spurs pawh hi Genk an ni lo," a ti a, an result hnuhnung chu inteh nana hman chi a nih loh thu a sawi. Mahse, German coach hian Spurs hi an insiamṭha mek tih erawh a hai lo. Klopp chuan, "Hei chu Tottenham thar an ni e," a ti a, an season bul ṭan chhiat an mangṭha mekah a ngai. 

Hriat tel tur erawh Spurs tan first choice keeper Hugo Lloris a inhliam mek a, Mohamed Salah, Roberto Firmino leh Sadio Mane dang turin a thachhang dawltu Paulo Gazzaniga rin ngam a harsa.