Vawiinah MPL inkhel pawimawh

October 24, Ningania Mizoram Premier League match hnih khelh tur chu chhum zin vangin ṭhulh a ni a, vawiin hian khelh a ni dawn. Chawhnu dar 2:00-ah Chawnpui FC leh Chhinga Veng FC te an inkhel ang a, tlai dar 4:00-ah Mizoram Police leh FC Venghnuai te an inkhel chhunzawm ang.

Mizoramin Santosh Trophy qualifier an khelh avangin MPL fixtures hi thlak danglam hret a ni tawh a, chhum zin vanga sawn a nih leh takah chuan player-te'n chawlh hahdam hun an nei tlem sawt ang. Karleh hian round hnih khelh a ni hdawn avangin club ṭhenkhat tan ni riat chhungin match thum khelh tur a awm dawn tihna a ni.

Mizo zinga AIFF match commissioner hmasa ber Lalrawngbawla chuan, "Team lamin starting eleven tur thehlut vek tawh mah se match ṭan hman a nih loh avangin starting eleven hi an thlak leh thei ang. Match chu ṭan hman ni se starting eleven hi a tih danglam theih tawh loh," tiin Vanglaini a hrilh.

Inkhelh hun sawn tlai hret ni mah se match pawimawh dan erawh a la ngai reng. Chawnpui FC-in relegate pumpelh turin Chhinga Veng an hneh ngei a ṭul a, Chhingcows-in a sang pali zinga awm chhunzawm turin chak an mamawh bawk.

Mizoram Police-in match hnuhnung pahnihah Electric Veng leh Chhinga Veng an hneh lo a, anmahni ang bawka chak mamawh FC Venghnuai an hmachhawn dawn. MPL club thar Venghnuai hian match hnuhnung pahnihah Aizawl FC leh Chanmari FC an hneh bik lo a, coach Rindika Hmar hoten semifinal khelh an tum a nih chuan an elpui laka tlawm a thiang lo. 

ROUND 7

October 26, Inrinni

Chawnpui FC    01:00 PM    Chhinga Veng FC

Mizoram Police    04:00 PM    FC Venghnuai

ROUND 8

October 29, Thawhlehni

FC Venghnuai    04:00 PM    Chhinga Veng FC

Ramhlun North    07:00 PM    Chawnpui FC

October 30, Nilaini        

Aizawl FC    04:00 PM    Electric Veng FC

Mizoram Police    07:00 PM    Chanmari FC

#    Team    Pld    W    D    L    GF    GA    GD    Pts

1    Aizawl FC    7    4    3    0    10    3    7    15

2    Chhinga Veng    6    3    3    0    12    8    4    12

3    Electric Veng    6    3    2    1    11    5    6    11

4    Chanmari FC    6    3    2    1    12    9    3    11

5    Mizoram Police    6    3    0    3    11    9    2    9

6    FC Venghnuai    6    1    3    2    5    8    -3    6

7    Ramhlun North    7    1    0    6    7    17    -10    3

8    Chawnpui FC    6    0    1    5    5    14    -9    1