UFC 244-ah Nate Diaz inlan dawn lo

Nate Diaz chuan karleha neih tur UFC 244-ah a inlan loh tur thu a sawi a, American fighter hian a fight hmachhawn theih loh chhan hi thisen test a paltlang loh vang a nih thu a sawi. 

Diaz hian twitter lamah test a paltlang loh thu hi sawiin, "Test ka paltlang lo tih min hrilh a, mahse keimah ni loin anmahni hi a ni ang damdawi hman phal loh hmang chu," a ti a, amah 'test' tute chu rui chunga endik ang hialah a puh. 

Kum 34 mi fighter chuan, "Chaw pangngai bak ka ei ngai lo a, sa takngial pawh ka ei lo," tiin a thiam thu a sawi a, "Ngawi reng tura min duh angin ka ngawi dawn lo. Mi daw heh tak anga ka nun hi lantir ka tum lo," a ti zui. 

Diaz hi November 2-a Jorge Masvidal nen inhnek tura tih an ni a, thil a danglam thut a nih loh chuan an in fight dawn lo tihna a ni - mahse Masvidal hian Diaz hmachhawn ngei a tum thu a sawi. Kum 34 mi Masvidal chuan, "November 2-ah kan inhmu dawn nia. Hetiang thil ṭha lo hi i ti lo ang tih ka hria," a ti a, New York khawpuia a hmachhawn tur fighter chuan damdawi hman phal loh a hman a ring lo.