A tawpah Aizawl FC an dingchang

I League club Aizawl FC-in nimin tlaia Ramhlun North an hmachhawn ṭumin harsatna an tawk a, point hloh thei dinhmuna an din hnuah Rochharzela'n player paruk zet a bum hnuah goal pawimawh a khung. Standly Rosario hote hian 3-1 in an hnehna an chang a, league hmahruaitu an ni chhunzawm zel.

Lammuala inkhel hmuhnawm takah Ramhlun North-in Lalpekhlua Jongte hmangin minute 29-naah hma an hruai a, Aizawl FC-in hun chanve hmalamah a chhanletna an hmu lo. Second half ṭan aṭanga minute 51-na lekah I League club-in F. Lalremsanga hmangin an siphurh an sut a, Chhara'n minute 80-naah goal ropui a khung. Inkhel thununtu Aizawl FC tan Joe Zoherliana'n injury time-ah chak nemnghehna goal a khung a, Ramhlun North-in an thawhrim rah an seng lo.

Aizawl FC-in Kolasib-ah goal thum an khung a, Ramhlun North-in khual khuaah goal li an chhuah. Ramhlun North-in an theihna an hria a, goal venghim tura tlarhnunga player rem tam an hreh lo.

Standly Rosario hoten rinlawk ang ngeiin ball an chang tam a; Remsanga, Isak Vanlalruatfela, Paul Ramfangzauva leh Richard Kassaga ten goal an khung teuh hle. Mahse Ramhlun North-in an chance vawi khat an hmang ṭangkai a, Lalpekhlua Jongte-in goal pawimawh a khung.

Ramhlun North-in game plan an tifuh a, first half chhung tawp Aizawl FC an chelh theih avangin I League club an talbuai hman hle. A tawpah erawh an fimkhur tawk lo a, goal venghim tura tha an sen nasat bawk avangin an ṭang tluan thei lo.

Aizawl FC-in chak an duh avangin na takin an nawr a, goal chance pawh an ngah. Pressure sangah an player hmabak nei êng ten an theihna rawn pholangin Isak-a cross ṭha zet chu Remsanga'n a tauh goal. 

Goal chance ṭhahnem tak awm zuiin goal luhna tak erawh Chhara thiam vang liau liau a ni thung. AFC winger Chhara hian a chhehvela Ramhlun North player paruk zet patlangin goal ṭha a khung a, hemi hnu hi chuan chak tur a chiang. Lengpui defender Zohera'n injury time-ah Paul-a hnen aṭanga a ball hmuh chu goal-ah a chantir.