Police thinrim ngamtu Venghnuai

Mizoram Premier League-a champion rinkai zinga mi Mizoram Police chuan Inrinni tlai khan MPL kaithar FC Venghnuai 1-0 in an hneh lo. Lalbiaksanga Colney hote hi match thum a zawna an chak loh avangin table-ah paruknaah an awm a, tun season-a an dinhmun chhiat ber ṭum an tawng mek. 

FC Venghnuai erawh team ṭha bik Police an hneh avangin head to head hmangin panganaah an awm a, an chung chiaha awm Chanmari FC nena an inthlauhna pawh point hnih chiah niin match khat leka inlehthal theih a ni.

Mizoram Police-in tun season-ah anmahni el tawk tura ngaih Aizawl FC, Electric Veng leh Chhinga Veng te an hneh lo a, MPL champion rinkai zingah Chanmari FC chiah an la hneh. Beisei ang result an neih loh avangin Kolasib-a Chhingcows nen an inkhelh ṭum pawhin inkhel a rorum viau a, captain Lalfakzuala chu hnawhchhuah a ngai hial.

MPL kaithar lakah Police chu hnehna chang ngei tura ngaih an ni a, amaherawhchu Lalrindika Hmar-in game plan felfai tak a lo duang. FC Venghnuai hian Aizawl FC laka an chesualna aṭanga inzirin an pawng paw nawr tawh lo a, goal venhim hna an thawk ta zawk. First half-ah Police-in ball possession 59% zet an nei a, goal zawnah vawi hnih chauh an pet - goal a luh loh avangin Venghnuai an hlawhtling.

Hun chanve hnu lamah pawh Police an la ṭha hret a, Venghnuai an bet mawl tawp lo. MPL kaithar hian nawrna chance a awmin an nawr ngam a, Police keeper F. Lalmuanawma'n Venghnuai midfielder HK Lalhruaitluanga goal khung tur a dan pawh a ṭha takzet. 

Injury time-ah Police-in Lalbiakhlua hmangin goal khungna chance ṭha bik an nei a, MPL-a ṭum hnih top scorer ni tawh hian keeper RS Lallawmzuala chauh a hmachhawn hnuah goal zawnah a pet thei lo. Venghnuai hian hun tawp lamah Police tlarhnung bulah player pathum an la dah ngam a, an huaisen rah an seng.

Injury time minute linaah Vanlalthanga'n ball chang fuhin Hualnghohmun tlangval hian mual dinglam aṭangin ṭha zetin a vawrh lut a, substitute PC Zosanga'n tauh fuh thei lo mah se Police defender H. Sanglianmawia'n anmahni lamah a tauh lut. Police tan siphurh sutna hun a awm tawh lo a, Venghnuaiin point hlu tak an hlawh chhuak.

FC Venghnuai coach Rindika Hmar-in Kolasib-a Aizawl FC an hneh loh zawhah banna a thehlut hial a, club hruaituten an pawmsak lo. Police hneh zawhah erawh Rindika'n inrintawkna nei let leh tawhin Venghnuai coach chuan, "Kan game plan ang chiahin kan khel," tiin an khelh danah a lungawi thu a sawi.

Police coach Lalbiaksanga Colney erawhin, "Vanduai ṭum hi a awm a ni," tiin Vanglaini a hrilh a, an inkhelah a thusawi dikna a lang. Chutihrualin Police hi MPL8 match sarihah vawi li an chak loh avangin a rang lama insiamṭhat an mamawh ang. 

MPL round 8 hi naktuk hian khelh chhunzawm a ni nghal dawn a, FC Venghnuaiin tlai dar 4:00-ah Chhinga Veng an hmachhawn dawn. October 30, Nilaini zanah Mizoram Police leh Chanmari FC te an inkhel dawn a, team ṭha pahnih beisei ang result nei lo inkhel tur hi en a châkawm takzet.