Chanmari aia êng Electric

Electric Vengin tun season-a a vawi hnih nan Zirtawpni zan Mizoram Premier League inkhelah Chanmari FC 1-0 in an hneh. Lalsangzuala Hmar hote hian I Day Football-ah Chanmari hi an hneh tawh a, tuna an hneh nawn leh tak avangin Electric Veng hi MPL club ṭha zingah an tel tih a chiang.

Chanmari FC-in S. Malsawmtluanga hoin MFA Super Cup leh I Day Football nomawi an chawi thei lo a, Mama hian round 5-a FC Venghnuai an hneh zawhah banna a thehlut. Chanmari club hotuten an coach banna an pawmsak danah result ṭha zawk an beisei tih a lang a, foreigner Godwin Quashiga an lakluh zui avangin nomawi an duh ngei tih nemnghehin a awm bawk.

Electric Veng lakah Godwin Quashiga-a'n bul a ṭan nghal a, EFC coach Lalsangzuala Hmar-in Chhinga Venga a enkawl tawh Godwin-a ṭhatzia a sawi rualin hmachhawn tura an inpeih thu a sawi lawk. Electric Vengin Godwin-a awmna lai aṭangin ball ṭha siam an tum lo a, halfway line aṭangin foreign player hi an vawrh khum thung.

Minute 10-na lekah PC Laldinpuia ball vawrhluh chu Lalrammawia'n Chanmari defender-te a tauh khalh hman a, Chanmari keeper Zothanmawia'n dang hman mah se Rammawia bawkin a per hi nangching hmanin goal pawimawh a khung.

Electric Veng an inrem ṭha a, Chanmariin an ṭhiat thei lo. Coach nghet nei lo Chanmari harsatna belhchhah turin substitute Lalremruata'n insum zawh loh vangin minute 77-naah red card a hmu a, Electric Vengin harsatna lutuk nei loin hnehna an chang.