Chelsea leh Pulisic an 'cial'

Turf Moor-ah Frank Lampard kaihhruai Chelsea-in an thiamzia an pholang a, mualneitu Burnley 4-2 in an sawp. Inrinni zan inkhelah hian Christian Pulisic chu Blues hero a ni a, American winger hian hattrick siamin a ke ding leh vei bakah a lu hmangin goal a khung.

Chelsea goal lina hi Willian-a'n minute 58-naah a khung a, Burnley-in Jay Rodriguez (86') leh Dwight McNeil (89') te hmangin khung ve bawk mah se result a danglam phah lo. Pulisic hi kum 21 leh ni 38 ni mah se Borussia Dortmund-ah hming a chher tawh avangin a kum phu loin a lar tawh a, a hming lemah pawh 'Captain America' an hmang hial.

Blues-in pound maktaduai 58 zetin Pulisic hi an lalut chungin Frank Lampard hnuaiah khelhna hmun nghet chan a harsat a, Burnley nena an inkhel hi a bul ṭan hmasak ber a ni. Pulisic hian Cham-pions League-a Ajax nen an inkhelh ṭumin bench aṭanga lutin Michy Batshuayi chakna goal khung tur a siamsak a, Premier League-ah erawh 'scoresheet'-ah a hming a chuantir thung.

American winger hian goal hmasa pahnih hi ṭha zeta a khalh hnua a khung a ni a, theihna sang bik player a nihzia a lang. Pulisic hian a lu hmangin goal a khung zui a, Tammy Abraham record khumin Chelsea tana hattrick siam thei naupang ber a ni.

Blues winger Callum Hudson-Odoi pawhin goal li a luh hnuah penalty a beisei a, amaherawhchu VAR hmanga ennawn a nih hnuah English winger hi yellow card pek a ni thung. Chelsea manager Frank Lampard chuan, "Manto takin kan lalut a, ṭha taka rawn khelh a duh nghal. Mahse kei chuan a ṭhat dan tur berin fimkhur takin thutlukna ka siam a, a khelh danah ka lawm takzet," tiin a sawi.