Bundesliga record siamtu Lewy

Bayern Munich striker Robert Lewandowski chu Bundesliga player zingah season tir lam match hmasa pakua a goal khung vek thei awmchhun a ni ta, a club hi Union Berlin lakah 2-1 in hnehna a chanpui.

Champion lai Bayern Munich an chak lai hian an elpui Borussia Dortmund erawh Schalke nen goal khung loin an inhnehtawk a, inkhel dangah Freiburg chuan an elpui RB Leipzig 2-1 in an hneh ve thung.

Arsenal forward Pierre-Emerick Aubameyang-a'n Dortmund tana a khelh laiin 2015-16 season khan match hmasa pariatah goal a khung vek a, he record ropui tak hi Bayern striker Lewandowski chuan kuminah a rawn khum chiah.

Poland international hi tunlaia striker 'hot' leh hmuhnawm ber a ni mek. Kum 2019 bikah a club tan goal 37 zet a khungsak tawh a, player ropui Lionel Messi, Cristiano Ronaldo leh Kylian Mbappe ten an phak lo.

Season kal laiah kum 31 mi Lewy hian Bayern tan inelna hrang hrangah match 14 a khelh aṭangin goal 19 a khung tawh, ram tan pawh a nep chuang lo. Euro qualifier-ah Poland leh Latvia inhmachhawn ṭumin hattrick a siam.