Chawnpui an par chhuak ta

Chawnpui FC chuan Mizoram Premier League table mawngphah chhuahsan turin Inrinni chhun khan Mizoram Police hneh zo hlim Chhinga Veng FC chu 3-2 in an lehthal a, HC Zarzoliana hoten point thum an hlawhchhuah zarah pasarihna dinhmun an luah. 

Chawnpui FC-in tlarhma an nei ṭha tih a lang chho a, I League thlenga tawnhriat nei tawh Lalnunpuia Tlau (Bawihpuia)-in a club thar tana a goal hmasa ber a khung bakah MPL-a hming langsar zinga telpha Vanlalthlamuana'n goal hnih a khung. Chhingcows erawhin 'risk' an la sual a, MC Malsawmzuala leh Lalmawizuala te hmangin goal khung hmasa mah se an inrem fuh loh tuarin tun season-a a vawi khat nan kut bengin an haw.

Chhinga Veng coach Anand Gurung-a'n a sawi lawk angin squad a rawn siksawi a, Mizoram Police an hneh ṭuma starting eleven aṭangin player pathum captain Vanlalzuidika, goalkeeper Lalruatpuia leh winger Malsawmdawnga te chiahin bul an ṭan nawn. 

Tlarhnungah Zuidika leh Saidingliana inkawpin mual sirah Lalmuanawma (C. Muana) leh Lalmawizuala te an awm. Midfield trio rawn thlak vekin Vanlalhriata, Omega VL Hruaitluanga leh F. Zosangliana te hmel hmuh a ni a, mual sir dinglamah khelhna chang tam lo Laldawngkima a rawn dah bawk. 

Tlarhmaah foreign striker Ouattara Sie chhawr tura a awm loh avangin MC Malsawmzuala a rawn inlan a, Siaha tlangval MC-a erawh MPL top scorer nilai a ni thung.

Chawnpui FC coach Zara erawhin point thum a sawi lawk ngam lo a, point hmuh ngei erawh an tum. Amaherawhchu, Chawnpui tlarhnung thawm ṭhat a la ni lo a, defender leh goalkeeper tihsual vangin Chhinga Vengin MC-a leh Mawizuala te hmangin hma an hruai a, Chhingcows an chak ngei dawn niin a lang.

Hun harsaah Zara hote tana beiseina siam turin Lalnunmawia ke aṭanga ball chhuak chu Bawihpuia'n chang fuhin minute 42-naah siphurh a sut ṭhen. Second half-ah Chawnpui ṭha zawk an rawn inlar a, captain Mawitea corner pet chu a nau Thlamuana'n a tauh goal a, minute 75-naah 2-2 a ni. 

Minute 82-ah Jonathan Lalhriatkima freekick pet chu Thlamuana bawkin tauh lut lehin 3-2 a ni a, Chawnpuiin hnehna an chang. Inkhel boruak erawh hun tawp thlengin a sang a, injury time-ah Chhingcows captain Zuidika an hnawtchhuak. Chhinga Vengin Chawnpui an zuam sual a, an intawn leh hunah chuan Zara hote an en dan a danglam tawh ang.