City an duai lo; Foxes an ropui

Premier League champion Manchester City-in table chung bera Liverpool thlah fal lutuk an duh lo a, Inrinni zan khan Aston Villa chu 3-0 a sawpin table-ah pahnihna an ni leh ta. 

City hian goal khung turin second half an nghah a ngai thung a, manager Pep Guardiola chuan, "First half-a kan khelh ang khan kan khelh chuan relegation zone-ah kan awm mai ang," a ti! Zirtawpni zan khan Leicester City chuan 9-0 ngawtin Southampton an sawp a, Champions League khel turin theihna an nei tih an pholang. 

Foxes tan Jamie Vardy leh Ayoze Perez ten hattrick an siam ve ve a, Chelsea, Arsenal, Tottenham  Hotspur leh Manchester United ten elpui thar an nei tihna a ni. 

Aston Villa-in Manchester City khelmuala an tih tur chin an hria a, tlarhnung lamah bet thlapin Pep Guardiola naute hi goal khung tir loh an tum - first half chhung chu an hlawhtling. 

Mahse, second half-ah Villa an chesual ta nge nge. Chawlhlawk zawh hnu second 20-na lekah goal an chhuah a, khel ṭha em em mai Raheem Sterling chuan goal hmahruai a khung. Sterling goal siamsaktu  Gabriel Jesus-a'n hun ṭha nei ve nghal mah se Tom Heaton-a save ṭha tak leh Tyrone Mings-a'n goal line aṭanga ball a petchhuah hmangin Villa an him. 

Minute 65-naah David Silva chuan City goal hnihna a khung chhunzawm a, minute nga hnuah Ilkay Gundogan chuan chak nemnghehna goal a khung chhunzawm - Fernandinho chu a yellow card pahnihna avangin hnawhchhuah ni mah se result a thlak danglam phak lo. 

City-in an goal hnihna an khungin VAR rawn a ṭul a, he goal hi  Kevin de Bruyne-a'n a shot Silva-a'n a ke hmanga a lo tawh zeuh hnua goal a ni. 

VAR hian Silva-a'n ball a tawh fuh leh fuh loh an en a, rei tak ennawn a nih hnuah Spanish midfielder hian ball a tawk fuh loa ngaih niin De Bruyne goal khungah an pawm. Mahse, inkhelh zawh hnuah Goal Accreditation Panel chuan pet goal-tu hi KDB ni loin Silva a nih thu an puang a, inkhelh lai khan Silva hian a tawk ngei a ni, tih tihchianna awm se chu goal-a pawm loh tur a ni lawi si!

Silva-a'n ball a tawh fuh chuan a hnunga ding Sterling kha offside tur a ni a, mahse referee-in KDB-a pet goal-ah a puang a, goal-ah an pawm - inkhelh zawhah Silva hmingin an pawm leh ta zawk si a ni ber. 

Brendan Rodgers-a enkawl Leicester City-in ngaihthah chi an ni lo tih pholangin goal kua ngawt an khung a, Premier League-a inhneh chiang ber record Manchester United-in 1995-a Ipswich Town laka an lo siam tawh chu an nihrual. 

Saints left back Ryan Bertrand chu minute 12-na lekah red card pek a ni a, Foxes tana goal khungna kawng hawnsaktu a ni - hriat tel atana ṭha erawh Bertrand hnawhchhuah hma hian Ben Chilwell chuan goal hmasa ber a khung tawh. 

Bertrand hi Chilwell goal khungna tura Leicester ball inpek kual karah a foul a, referee-in ball kal lai titawp loa Foxes hi a hmawr a bawk tir hnuah Bertrand hi red card a pe a ni. Chilwell bakah Youri Tielemans leh James Maddison te pawhin goal khat ve ve an khung a, Vardy leh Perez ten hattrick an siam bawk - Vardy hian league match 10-a khelha goal kua a khungna a ni ta.