Spurs aia thiam zawk Liverpool an vul

Pathianni zan Premier League inkhel ngaihven hlawhah Tottenham Hotspur-in Liverpool lakah Harry Kane hmangin goal khung hmasa mah se Reds chhaih thinrimna goal mai a ni a, 2-1 in an tlawm. 

Anfield-a inkhelah Jordan Henderson leh Mohamed Salah (penalty) ten Liverpool tan an khung a, result hi inkhel hrilhfiah nan erawh a tling tawk lo - Reds hian vawi 21 zet shot an nei. Spurs tan keeper Paulo Gazzaniga chu player langsar ber a ni a, vawi tam save ropui a nei chungin a team erawh a chhanhim zo lo. 

Liverpool-in hnehna an chan avangin point ruk zeta hma hruai falin table chung ber an luah chhunzawm zel a, Tottenham Hotspur erawh 11-naah an awm a ṭul. 

Anfield-ah inkhel ṭanna hamrik zawh ruala fans au thawm pawh a reh hmain Tottenham Hotspur-in goal an rawn khung nghal a, Jordan Henderson-a ball hloh chu Kane chuan goal-ah a chantir. 

Liverpool captain ball hloh aṭanga ball kal zel hi Son Heung-min chuan bar-a pet per a, a per lehlam hi a awmna tur taka awm Kane hian a lo tauh lut. "European champion kan ni," tia zai rual Reds fan-ten an ṭhutna pawh an rem fel hman lo a, season hmasa Champions League final-a an hneh hnu Spurs tih elna banner an ken te pawh an pawt mar ṭha hman lo!

Hendo chuan, "Second 48 hnuah khan ka tisual tih ka inhria a, ka ball hloh vanga goal a ni. Mahse, vanneihthlak takin goal hmangin ka chhanglet thei hlauh a ni," a ti. 

Liverpool-in hma takah goal an chhuah a, an insiamṭha nghal. Na takin Spurs an nawr chhunzawm a, Hugo Lloris inhliam vanga bul ṭan Gazzaniga 'kut' a rim hle. 

Kum 27 mi goalkeeper hian minute 20 liam hnuah vawi hnih ngawt chu ṭha zetin Mohamed Salah 'shot' a dansak a, Roberto Firmino leh Virgil van Dijk-te khung ngei tura lang a dan pawh fak phu a ni. Trent Alexander-Arnold-a'n ball pet thiam bik a ni tih pholangin shot ṭha zet a rawn nei ve bawk a, hei pawh Gazzaniga rintlakzia pholanna mai a ni - Mane chuan hnai set sawt aṭangin a tauh goal lo zui. 

Reds-in 76% ball an chang chung leh target-a vawi 10 shot an nei hman chungin goal an zawng hmu zo lo a, Gazzaniga kut phah chu Spurs himna a ni. 

Liverpool-in European champion rilru diktak an chhuah a, first half-ah vawi tam an hlawhchham chungin goal khung tum an ṭhulh phah lo. Minute 52-naah Hendo chuan goal a rawn khung ta nge nge a, sir lam 

aṭanga half-volley hmanga a shot neih hi Gazzaniga tan dan rual a ni lo. Anfield thawm a ṭha hle. 

Spurs-in counter attack hmangin chance nei ve zauh ṭhin mah se Hendo goal khung hmaa Son-a'n crossbar a tih per tih loh chu hlauhawm takin an che hleithei lo a, Anfield neitu chu Liverpool an ni. Minute 15 chauh hun a awm tawh tihah Serge Aurier chuan Sadio Mane a ti tlu a, penalty a chawi. Salah tan goal-a chantir turin harsatna a awm lo a, 2-1 in Reds an chak. 

•    Liverpool hi Anfield-a Premier League match 45 an khelh hnuhnungah an tlawm miah lo. Anfield-a an league match neih leh hmasak ber tur chu November 10-ah a ni a, Manchester City an mikhual dawn. 

•    Tottenham-in Premier League-a away match an khelh 11 chu a zawnin hnehna an chang zo ta lo a, vawi kua an tlawm a, vawi hnih an inhnehtawk. 

•    Liverpool-in Premier League home match-a big six an hmachhawn hnuhnung 20-ah chak loh an nei ta lo a, vawi 12 chakin vawi riat an khingpui an inhnehtawkpui. 

•    Gazzaniga khan vawi 12 ngawt save a nei a, Manchester United goalkeeper David de Gea-a'n Arsenal lakah December 2017-a vawi 14 save a neih hnua Premier League match khata save ngah ber a ni. 

•    Henderson tan December 2015 hnua Anfield-a Premier League goal a khung leh hmasak ber a ni. 

•    Kane chu Premier League match 191-a khelhah goal 150-ah a inrawlh ta a, vawi 131 pet goal in vawi 19 assist a nei. 

•    Mohamed Salah chu hliam vanga lakchhuah ni mah se Jurgen Klopp chuan a ngaihtuahawm loh thu a sawi. 

•    Liverpool hian Nilaini zan dar 1:00-ah Arsenal nen League Cup last 16 an khel lehnghal ang a, Spurs erawh an tlak tawh avangin November 3 Premier League-a Everton an lenchilh tur chu  an match neih leh hmasak ber a ni.