Basel fapa rangkachak Federer

Tennis ball boy a nih ṭhinna hmunah Roger Federer chu a vawi 10 nan chawimawiin a awm leh ta. Pathianni zan Swiss Indoors final-ah Federer hian Alex de Minaur hnehin nomawi a chawi.

Grand Slam vawi 20 champion tawh Federer-a'n world number 24 lakah zahngaihna a lantir lo, minute 34 chhung lekin set khatna a la - set hnihnaah pawh game hnih chauh hlauh chungin 6-2, 6-2 in hnehna a chang.

Kum 38 mi tennis player ropui hian ATP hnuaiah nomawi 103 ngawt a chawi tawh a, Basel khawpuiah bik hian match 24 ngawt a chak zawn - atan chuan an khua hi a bul ṭanna a nih tluk zetin a hun tawp lamah pawh a ropuina hmun a ni zel.

Federer chuan, "Tournament pakhatah hian vawi 10 zet ka champion thei ang tih hi ka ngaihtuah phak ngai lo, tunah chuan Basel-ah kher hetiang hun ka tawng leh ta hi a lawmawm dan a thuk bik. Fans lamin min pui ṭha a, ka tan chuan chawlhkar nuam leh hlimawm tak a ni," a ti.

Kumin tir lam khan grass court inelna Halle Open-ah Federer hian a vawi 10 nen nomawi a lo chawi tawh bawk a, a kum tam deuh tawh mah se tennis khel thiam bik a nihna chu a la nep chuang lo.