Man City leh Leicester inlan zan

Carabao Cup last 16 chu zanin aṭangin khelh ṭan a ni dawn a, champion lai Manchester City chuan zanin dar 1:15-ah Southampton an mikhual ang. Kartawp inkhela Saints 9-0 zeta sawptu Leicester City-in League One club Burton Albion hmachhawn turin Pirelli Stadium an pan ang.

Inkhelh en châkawm bik erawh naktuk zanah khelh a ni dawn a, Liverpool-in an mual Anfield-a Arsenal an mikhual tur leh Stamford Bridge-a Chelsea leh Manchester United inkhel turte chu football ngainatute tana chil tih putna 

tham a ni.

Manchester City-in Premier League club Southampton hmachhawn dawn mah se tun hnaia an khelh dan thlirin quarterfinal an thleng lo a nih chuan 'upset' tia chhiar theih a ni ang. 

Pep Guardiola-a'n kartawpa Aston Villa an hneh ṭumin Kyle Walker, Nicolas Otamendi, Riyad Mahrez leh Sergio Aguero te bench-ah a dah a, League Cup-ah heng player tawnhriat nei ṭha tak tak hi an luh a rinawm. Midfield-ah Guardiola chhawr theih turin Phil Foden leh Ilkay Gundogan bakah Spanish rawlthar Adrian Bernabe te an awm. Tlarhnungah hrem vangin Fernandinho chhawr theih a ni lo a, Otamendi tan Pep-a rilru hmin theihna hun remchang a ni thei ang a, a kawppui turin Eric Garcia a awm.

Goalkeeper-ah khelhna hmun chang meuh lo Claudio Bravo-a'n hmun a chang a nih pawhin thil mak a ni lo ang. League Cup hi minute 90 chhung khelh a ni a, extra time awm loa penalty shootout neih nghal tur a nih avangin Southampton tan pawh beiseina tlem a awm. Chutihrualin Saints hian Foxes 9-0 in an hneh lo a, kartawpah Man City bawk league-ah an hmachhawn nghal dawn avangin hmabak phurawm tak a ni lo.

Season liam ta khan League One club Burton Albion-in semifinal an lut a, champion zui ta Manchester City lakah 9-0 in an chak lo. Zanina Nigel Clough te mikhual tur Leicester City hian Saints lakah goal kua an khung thei a, Burton Albion-in fimkhur takin bul an ṭan ang.

Chutihrualin Brendan Rodgers-a'n League Cup hi a ngaih pawimawh ber a nih a rinawm lo a, hattrick siamtu pahnih Ayoze Perez leh Jamie Vardy bakah player pawimawh dang James Maddison, Kasper Schmeichel leh Youri Tielemans te a awltir ngam a rinawm.

Premier League club pahnih Everton leh Watford te Goodison Park-ah an inhmachhawn dawn. Toffees hi league-ah 16-naah an awm a, season thara European competition-a tel phak aiin tlak an hnaih zawk. Hornets an danglam lo - table mawngphahah an awm mek. Team pahnih tan League Cup hi team chhung boruak tih phur nan a pawimawh ang.