Zaninah Relegation Battle Ramhlun North Vs Chawnpui FC

Mizoram Premier League Season 8 khelh tawh chinah Ramhlun North leh Chawnpui FC te team dang aiin an nem a, tun dinhmuna a lan dan chuan an pahniha pakhat zawk hi 'relegate' tura ngaih an ni. Zanin dar 7:00 hian Lammualah team pahnih an inhmachhawn dawn a, inkhel pawimawh bik a ni ang.

Round 2-ah khan Ramhlun North FC-in Chawnpui 3-0 in an hneh a; Jessy Vanlalmuana, Kaleba Lalnunhlima leh Lalthankhuma ten goal khat ṭheuh an khung. Amaherawhchu, hemi hnu hian Ramhlun North hian point an hmu leh tawh lo.

Chawnpui FC erawhin FC Venghnuai lakah point khat an hlawhchhuah bakah Chhinga Veng an hneh thei a, point li an hmu tawh. Zaninah pawh Chawnpui hi chak tura rinkai zawk an ni leh tawh a, HC Zarzoliana'n tlarhmaah captain Lalnunmawia, T. Lalnunpuia (Bawihpuia) leh Vanlalthlamuana te a kawl avangin Ramhlun North tlarhnung tan fimkhur a ṭul dawn.

Ramhlun North hian an match hnuhnung berah Aizawl FC an chelh ṭep a, minute 90 erawh an ṭang thei lo. Jonathan C. Lalrintluanga (Thantea) hian zaninah erawh goal venhim tawp an duh dawn bik lo a, an hneh tawh lakah chak nawn an duh dawn avangin attacking football a beisei theih ang.