Arsenal captain Granit Xhaka a titau!

Emirates Stadium a chhuahsan dawnin Granit Xhaka chu Arsenal fans lamin an 'Boo' hum hum a, an captain chunga an chet dan hian Gunners dinhmun tam tak a sawi chhuak. An mikhual Crystal Palace nen 2-2 a an inhnehtawk aiin Xhaka leh manager Unai Emery te chanchin chu sawi zui hlawh a ni.

Pathianni zan Premier League inkhelah Arsenal hian a tir lam minute kua chhung lekin Sokratis Papastathopoulos leh David Luiz te goal hmangin hma an hruai. Mahse, mikhual lamin Luka Milivojevic leh Jordan Ayew te hmanga chhang letin chak zawk an awm lo.

Arsenal lamin bul an ṭan fuh a, hma takah defender pahnih Sokratis leh Luiz ten goal an khung avangin nuamsa taka chak tura ngaih an ni. Mahse, ni dang ang bawkin Gunners tlarhnung a pawp - an neih sa pawh an hum thei lo a ni.

Nipui laia Arsenal nena sawi zawm Wilfried Zaha chu box chhungah a tlu a, referee Martin Atkinson-a'n tlu derah ngaiin yellow card a pe. Amaherawhchu, video assistant referee hman a nih hnuah Calum Chambers chu a dik lo zawk, penalty chawiin Milivojevic-a'n si phurh a sut ṭhen.

Second half minute sarihnaah Ayew chuan James McArthur-a cross ball tauh lutin si phurh a sut zo. Hun tawp dawnah Gunners lamin Sokratis hmangin chakna goal khungah an inngai, mahse VAR hmanga endik a nih hnuah Chambers chu Milivojevic lakah a foul avangin hnawlsak an ni.

Minute 61-na a ni a, midfielder Granit Xhaka chu Bukayo Saka-a'n a rawn thlak. Team pahnih inhnehtawk lai a ni a, Switzerland international hi a khelh ṭhat loh bakah goal mamawh vangin tlarhma lam thuam chak a ni.

Unai Emery-a'n captain nghet atana a ruat Xhaka chhuak tur chu fans lamin nasa takin an au el a, player luhlul Xhaka a duai lo - a beng chhit khumin an 'boo' ri chu a ngaithla, khelmual chhuahsan tlang nghalin a jersey a hlip bawk.

Arsenal manager Emery chuan, "Thinrima thil sawi ka duh lo, mahse chiang taka sawi theih chu thil a ti dik lo a ni. Ngun takin a chungchang thu hi ngaihtuaha thutlukna siam a ni ang," a ti. Spanish manager hian captain thar a ruat a nih loh pawhin fans rilru na thawi dam dan a ngaihtuah a ngai dawn.

Kum 27 mi Xhaka hi player huaisen tak chu a ni. Mahse, hun lo taka foul leh ball hloh a ching a, card a hmuh hnem bawk avangin Gunners fans lamah chuan a tla na lo. Manchester United nen an inkhelh ṭuma a lu zawna ball kal a kun san vanga goal tawh player hi fans lam chuan captain a nihna hlihsak an duh ngei a rinawm.

Arsene Wenger chhuak tura duhtu ten lawm takin Unai Emery an lawmlut a, Spanish manager hian kum hnih daih contract a neih chu tun season tawp rualin a hmang zo dawn. Arsenal ṭantute zingah contract pawh sei duh aiin tih tawpsak duh an tam a rinawm.

Paris St-Germain manager hlui hian Gunners player hlawh hnem ber Mesut Ozil chu a chawr duh lo a ni satliah lo a, tun hnaiah chuan squad-ah pawh a telh ngai lo. Crystal Palace lakah Kieran Tierney-a'n a vawi khat nan league-ah inkhel bul a ṭan.

Hliam dam tawh Hector Bellerin leh Rob Holding te chu bench lama dah an la ni a, tawnhriat nei zawk Luiz leh Sokratis te inkawp chu an phui lo chhunzawm. Emery hian season khat leh a chanve hun a hman hnuah khelh dan nghet a la nei thei lo - hei hi fans lamin an duh loh chhan lian tak a ni.

Kum 47 mi Emery chuan, "Hun tawp lam minute 20 chhung khan fans lamin player an pui ṭha em em, mimal thil pakhat kal fuh lo lai a awm a ni mai a, a bak zawngah chuan thawhhona a ṭha vek," a ti. Boruak a ṭhat thu sawi a ngaih fo tawh chuan a ṭha tawk lo ṭhin.