La Liga hmahruaitu Granada

Spanish La Liga inelnaah Granada chuan table chung ber an luah a, he dinhmun luah tur hian Pathianni zan khan Real Betis chu 1-0 in an hneh. 

Betis winger hlui Alvaro Vadillo chuan he inkhela goal awmchhun hi hnai set sawt aṭangin a club hlui lakah a khung a, Carlos Fernandez siamsak a ni. La Liga kai thar Granada hian match 10 an khelh aṭangin point 20 an nei a, mahse zaninah Barcelona an inlan dawn avangin an dinhmun hi danglam leh thei a ni. 

Catalan club hi fixture hmasa ang chuan Inrinni zan khan Real Madrid nen El Clasico khel tur an ni a, mahse tun hnaia Catalonia buaina avangin club pahnih inkhelh hun hi an sawn. Catalonia hian hun rei tak chhung chu Spain aṭanga inlak hran an tum tawh a, mahse tun hnai khan Catalan hruaitu pakua man an nih avangin buaina a thleng nasa hle. 

Barcelona hian zanin dar 1:45-ah Real Valladolid an mikhual dawn a, Real nen hian an inkhelh hun sawn a nih avangin club dang zawngin match 10 an khelh tawh laiin match kua ve ve chiah an la khel. Real Madrid hi Nilaini zan dar 1:45-ah an inlan ve dawn chauh a, Leganes an mikhual ang. Atletico Madrid chu zanin dar 11:30-ah an inlan dawn bawk a, Alaves khelmualah an leng ang.