Hamilton chak mah se title a la hmin lo

Lewis Hamilton chuan ropui takin Mexican Grand Prix-ah hnehna a chang leh ta a, nomawi a kawl lai humhim tur erawh chuan intlansiak dang a nghah leh rih a ngai dawn.

November 4 hian US Grand Prix an tlan leh dawn a, hmahruaitu Hamilton hian a teammate Valtteri Bottas aiin point 22 ngawtin a hmu tlem a nih ngawt loh chuan a vawi ruk nan Formula 1 driver champion a ni ang - chungnung ber ni turin point li chauh a mamawh tawh tihna a ni.

Team championship lamah Mercedes chu a chungnung ber an ni chiang tawh a, team boss Toto Wolff chuan intlansiak hmabak an la neih chu an tan a awlsam loh tur thu a sawi tawh. Mexican Grand Prix tlanna Autodromo Hermanos Rodriguez chu a awmna hmun a san avangin buaina an neih a hlauh thu a sawi lawk.

Mahse, inelna tak an neihah erawh Mercedes bawk an chungnung. Lewis Hamilton-a'n Mexico khawpuiah a vawi hnih nan hnehna a chang a, car intlansiakna sang berah hian ṭum 83 ngawt a chakna hun a tawng bawk.

Britain tlangval Hamilton hnungah hian season chawhnu lama harh thar Sebastian Vettel a thleng a, German driver hi Valtteri Bottas leh a hmasa ber aṭanga inelna bul ṭantu Charles Leclerc ten an dawt bawk a ni.

Kum 34 mi Hamilton chuan, "Kawng thui a tam avangin Ferrari kha el an harsa dawn tih kan hre sa. Mahse, keini lam pawhin car kan nei ṭha tawk a, hnehna kan chan theih nan ruahmanna fel tak kan nei," a ti. Hamilton hian title lak a hmanhmawh loh thu leh, inelna dang a ngaihpawimawh thu a sawi tel bawk.

Chak tura rinkai ni chungin Ferrari an inlan a, an driver pahnih Charles Leclerc leh Sebastian Vettel ten hma hruai thei ve ve mah se an hum zo lo, a tawpah chuan pahnihna leh palinaah an lungawi a ngai.

Ferrari tan tun ṭuma an chet dan hi result chhia a ni lo. Mahse, season chawhma lam an tih ṭhat loh an tuar zel a, an elpui Mercedes champion lai chu hreh tak chungin an thlir ngei a ngai dawn - thil mak a thleng a nih ngawt loh chuan an tan kawng a awm tawh lo.

World champion vawi li ni tawh Vettel chuan, "Chawl loin inelna kan hmachhawn rei ta hle a, hetiang zel chuan Hamilton tan pawh a awlsam lo ang. Keini lam chuan tun aia hriam leh ṭha zawk hian hnehna chan theih dan kan ngaihtuah chhuah zel a ngai," a ti.

Formula 1 season kal laiah United States Grand Prix bakah Brazilian Grand Prix leh Abu Dhabi Grand Prix te tlan hmabak a la ni a, inelna hnuhnung pahnihah hi chuan champion a chian hman tawh a rinawm.